தமிழகத்தில் இன்று 937 பேருக்கு கொரோனா உறுதி

 தமிழகத்தில் இன்று 937 பேருக்கு கொரோனா உறுதியாகியுள்ளது. இதனால் பாதிக்கப்பட்டவர்களின் எண்ணிக்கை 8,18,014 ஆக அதிகரித்து உள்ளது. தமிழகத்தில் உள்ள 237 ஆய்வகங்கள் (அரசு-67 மற்றும் தனியார்-170) மூலமாக, இன்று மட்டும் 68,761 மாதிரிகள் பரிசோதனை செய்யப்பட்டு உள்ளன. இதனுடன் சேர்த்து, இதுவரை ஒரு கோடியே 41 லட்சத்து 91 ஆயிரத்து 494 மாதிரிகள் சோதனையிடப்பட்டன.

இன்று கொரோனா உறுதியானவர்களில், 573 பேர் ஆண்கள், 364 பேர் பெண்கள். கொரோனா பாதித்த, ஆண்களின் மொத்த எண்ணிக்கை 4,94,355 ஆகவும், பெண்களின் எண்ணிக்கை 3,23,625 ஆகவும், மூன்றாம் பாலினத்தவர்களின் எண்ணிக்கை 34 ஆகவும் உள்ளது. இன்று மட்டும் 1,038 பேர் டிஸ்சார்ஜ் செய்யப்பட்டனர். இதனால், வீடு திரும்பியவர்களின் எண்ணிக்கை 7 லட்சத்து 97 ஆயிரத்து 391 ஆக உள்ளது.

இன்று மட்டும் கொரோனா பாதித்த 13 பேர் உயிரிழந்தனர். அதில், 7 பேர் தனியார் மருத்துவ மனையிலும், 6 பேர் அரசு மருத்துவமனையிலும் உயிரிழந்தனர். இதனால், தமிழகத்தில் கொரோனா உயிரிழப்பு 12,122 ஆக அதிகரித்துள்ளது. தற்போது 8,501 பேர் சிகிச்சையில் உள்ளனர். இவ்வாறு அறிக்கையில் கூறப்பட்டுள்ளது.

ஊழல் தி.மு.க. உடைகிறதா? - சன் டிவி யில் அ.தி.மு.க. விளம்பரத்துக்கு கடும் எதிர்ப்பு....! கண்டனம் தெரிவித்த தி.மு.க., எம்.பி..

சன் டிவி யில் அ.தி.மு.க. ஆட்சிக்கு ஆதரவான விளம்பரங்கள் வெளியிடப்படுவதற்கு தி.மு.க தொண்டர்களிடம் கடும் எதிர்ப்பு எழுந்துள்ளது. இது தொடர்பாக தி.மு.க தொண்டர்கள் பலரும் கண்டனம் தெரிவித்துவரும் நிலையில், இது தொடர்பாக அக்கட்சியின் தருமபுரி எம்.பி. டாக்டர் செந்தில்குமார் கொதித்தெழுந்து ட்வீட்டியுள்ளார்.

செந்தில்குமார் எம்.பி. கூறியிருப்பதாவது : "சேற்றில் ஒரு கால் ஆற்றில் ஒரு கால் என்பது ஏற்க முடியாதது. சன் டிவி பெரிய வணிகசாம்ராஜ்யமாக இருக்கலாம். ஆனால் கலைஞரின் உடன்பிறப்புகள் மற்றும் நம் தளபதியின் லட்சக்கணக்கான அடிமட்ட தொண்டன் இவற்றை லேசாக எடுத்துக் கொள்வதில்லை. ஒன்று அதிமுக விளம்பரங்களைச் சுமந்து பணம் சம்பாதியுங்கள் அல்லது திமுக தொண்டனுக்கு விசுவாசமாக இருங்கள். இரண்டில் ஒன்றை மட்டும் செய்யுங்கள்" என்று அதிரடியாக தெரிவித்துள்ளார்.

மற்றொரு ட்வீட்டில் அவர் கூறியிருப்பதாவது : 'எங்களுக்கு தொழில் தான் முதல். அது தான் முக்கியம். திமுகவிற்கு எங்களுக்கும் எந்த தொடர்பும் என்றும் இருக்காது. திமுக விடம் எந்த எதிர்பார்ப்பும் எங்களுக்கு இல்லை,' என்று வெளிப்பயடையாக அறிவித்து விட்டு இது போல் விளம்பரங்களை அவர்கள் ஒளிபரப்பட்டும்."

தருமபுரி எம்.பி.யின் இந்த பதிவுக்கு தி.மு.க தொண்டர்கள் ஏராளமானோர் பெரும் ஆதரவு தெரிவித்து பதிவிட்டு வருகின்றனர். "பங்காளி நீங்க சொன்ன பிறகு தான் அடிக்கடி போடுறாங்க....!" என்று ஒருவர் பதிவிட்டுள்ளார்.

தி.மு.க தொண்டர்களின் கடும் கண்டனங்களுக்கு பிறகும் சன் டிவி யில் அ.தி.மு.க. ஆட்சிக்கு ஆதரவான விளம்பரங்கள் வெளியிடப்படுமா அல்லது, இந்த விவகாரத்தால் அக்கட்சிக்குள் பிளவு ஏற்படுமா என்பது விரைவில் தெரியவரும்.

திமுகவினர் நம்மை திசை திருப்புவார்கள்... அதற்கு ஆட்படாமல் நமது வேலையை நாம் பார்க்க வேண்டும் : அமைச்சர் சி.வி.சண்முகம்

அதிமுக ஆரம்பித்து 50 ஆண்டுகளில் 31 ஆண்டுகள் ஆட்சியில் இருந்துள்ளோம் என்று சிதம்பரத்தில் நடந்த தேர்தல் ஆலோசனைக் கூட்டத்தில் சட்டத்துறை அமைச்சர் சி.வி.சண்முகம் தெரிவித்தார்.

சிதம்பரம் தொகுதி அதிமுக தேர்தல் ஆலோசனைக் கூட்டம் சிதம்பரத்தில் உள்ள தனியார் திருமண மண்டபத்தில் இன்று நடைபெற்றது. இந்தக் கூட்டத்துக்கு கே.ஏ.பாண்டியன் எம்எல்ஏ தலைமை தாங்கினார்.

இதில் கலந்துகொண்டு மண்டலப் பொறுப்பாளரும், சட்டத்துறை அமைச்சருமான சி.வி.சண்முகம் பேசுகையில், ''இந்தத் தேர்தல் நமக்கு ஒரு சவாலான தேர்தலாகும். இந்தத் தேர்தலில் கண்டிப்பாக நாம் வெற்றி பெற்றே ஆக வேண்டும். ஏனெனில் ஜெயலலிதா இல்லாத ஒரு தேர்தலைச் சந்திக்கின்றோம். எனவே, கட்டாயம் நீங்கள் வெற்றியைப் பெற்றுத் தர வேண்டும். அனைவரும் ஒற்றுமையாக இருக்க வேண்டும்.

இந்த மாவட்டம் ஜெயலலிதாவின் கோட்டை ஆகும். பெண்கள் இந்தக் கூட்டத்தில் அதிகமாக உள்ளனர். பெண்களால்தான் சமையல் அறை வரை கூடச் சென்று வாக்குக் கேட்க முடியும். அதனால் ஆண்களாகிய நீங்கள் களத்தில் இறங்கிக் கடுமையாக வேலை செய்ய வேண்டும். வாக்காளர்களைப் பார்த்துத் தொடர்ந்து வணக்கம் சொல்லுங்கள். இதன் மூலம் ஓட்டு விழும்.

அதிமுக ஆரம்பித்து 50 ஆண்டுகளில் 31 ஆண்டுகள் ஆட்சியில் இருந்துள்ளோம். ஜெயலலிதா தன் கடைசிக் கூட்டத்தில் பேசுகையில் இந்தக் கட்சி 100 ஆண்டுகளைக் கடந்தும் இருக்கும். இதற்கு எல்லாரும் பாடுபட வேண்டும் என்று கூறிச் சென்றுள்ளார். அதை மனதில் வைத்துக்கொண்டு செயல்பட வேண்டும்.

இன்றும் 2 மாதங்களில் தேர்தல் வர உள்ளது. தேர்தல் வரை நமக்குள் இருக்கும் சண்டை சச்சரவுகள் அனைத்தையும் ஒதுக்கி வைத்துவிட்டுக் கடுமையாக உழைக்க வேண்டும். உழைத்தால் அதிமுகவில் பதவி கிடைக்கும்.

திமுகவினர் பிரச்சாரத்தில், செய்யாததைச் சொல்லி ஓட்டுக் கேட்பார்கள். ஆனால், நாம் செய்யக்கூடியதை மட்டும் சொல்லித்தான் ஓட்டு கேட்போம். திமுகவினர் நம்மை திசை திருப்புவார்கள். அதற்கு ஆட்படாமல் நமது வேலையை நாம் பார்க்க வேண்டும். திமுகவை நாம் அழிக்க வேண்டாம். இந்தத் தேர்தலுக்கு பிறகு அது தானாகவே அழிந்துவிடும்'' என்று அமைச்சர் சி.வி.சண்முகம் தெரிவித்தார்.

கூட்டத்தில் காட்டுமன்னார்கோவில் எம்எல்ஏ முருகுமாறன், முன்னாள் அமைச்சர்கள் செல்வி ராமஜெயம், கலைமணி, சிதம்பரம் நகரச் செயலாளர் செந்தில்குமார் உள்ளிட்ட பலவேறு நிர்வாகிகள் கலந்துகொண்டு பேசினர். இக்கூட்டத்தில் 3 ஆயிரத்துக்கும் மேற்பட்ட அதிமுகவினர் கலந்து கொண்டனர்.

புத்தாண்டை முன்னிட்டு நாட்டு மக்களுக்கு குடியரசுத் தலைவர் ராம்நாத் கோவிந்த் வாழ்த்து

குடியரசுத் தலைவர் ராம்நாத் கோவிந்த் வெளியிட்ட வாழ்த்துச் செய்தியில், "இந்தியா மற்றும் வெளிநாடுகளில் வாழும் அனைத்து மக்களுக்கும் எனது மனப்பூர்வமான புத்தாண்டு வாழ்த்துகளைத் தெரிவித்துக் கொள்கிறேன்.

ஒவ்வொரு புத்தாண்டும் புதிய தொடக்கத்துக்கான வாய்ப்பை வழங்குவதோடு, தனிநபர் மற்றும் கூட்டு மேம்பாட்டுக்கான நமது உறுதியை வலுப்படுத்துகிறது.

கரோனா காரணமாக உருவாகியுள்ள சூழ்நிலை நாம் அனைவரும் ஒன்று சேர்ந்து முன்னேறுவதற்கான வாய்ப்பாகும். வேற்றுமையில் ஒற்றுமை என்ற நமது நம்பிக்கையை வலுப்படுத்தும் கலாச்சார மதிப்புகளை வலுப்படுத்துவதற்கான நேரமிது.

2021-ஆம் ஆண்டு துவங்கும் இந்த வேளையில், அன்பு, கருணையுடன் கூடிய, அமைதி மற்றும் நல்லிணக்கத்தை ஊக்கப்படுத்துகிற அனைவருக்குமான சமுதாயத்தை உருவாக்க நாம் அனைவரும் இணைந்து பாடுபடுவோம்.

நீங்கள் அனைவரும் பாதுகாப்பாகவும், ஆரோக்கியத்தோடும் இருந்து, நமது நாட்டின் வளர்ச்சிக்கான பொது இலக்கை எட்டுவதற்கு புதிய உற்சாகத்துடன் முன்னேற வேண்டும்," என்று தமது வாழ்த்துச் செய்தியில் குடியரசுத் தலைவர் கூறியுள்ளார்.

அதிமுக தலைமையில் தான் கூட்டணி எடப்பாடியார் உறுதி

அதிமுக தலைமையில் தான் கூட்டணி அமைக்கப்படும் .அதனை ஏற்பவர்களே கூட்டணியில் இருப்பார்கள் என முதல்வர் பழனிசாமி கூறி உள்ளார்.

திருச்சியில் பிரசாரம் மேற்கொண்டுள்ள தமிழக முதல்வர் பழனிசாமி கூறியதாவது: கடந்த மக்களைவை தேர்தலில் அமைந்த கூட்டணியே தற்போது நீடித்து வருகிறது. அ.தி.மு.க.,அதிமுக தலைமையில் தான் கூட்டணி அமைக்கப்படும் .அதனை ஏற்பவர்களே கூட்டணியில் இருப்பார்கள் . உட்கட்சி பூசல் என்பது அ.தி.மு.க. வில் மட்டுமல்ல இந்தியா முழுவதிலும் உள்ள கட்சிகளிலும் உள்ளது. கூட்டணி குறித்த பேச்சுவார்த்தை தொடர்ந்து நடைபெற்று வருகிறது. தமிழகத்தில் தேர்தல் தேதி அறிவித்த பின்னரே கூட்டணி களின் நிலை தெளிவாகும். \

சசிகலா வெளியே வந்தாலும் அரசியலில் மாற்றம் வராது

மார்ச் மாதம் தேர்தல் தேதி அறிவித்து விடுவார்கள் என்பதால் நாட்கள் குறைவாக உள்ளது. பொது தேர்வு தொடர்பாக அனைத்து தரப்பினரிடமும் கலந்தாலோசித்து முடிவு எடுக்கப்படும். இவ்வாறு அவர் கூறினார்.

20 நாள்களுக்கு முன்பு இறந்த பெண் காவலர் சடலத்துடன் வீட்டிற்குள் ஜெபம்... திண்டுக்கல்லில் பரபரப்பு

20 நாள்களுக்கு முன்பு இறந்த பெண் காவலர் சடலத்துடன் வீட்டிற்குள் ஜெபம் நடத்திய சம்பவம் திண்டுக்கல்லில் பரபரப்பை ஏற்படுத்தியுள்ளது.

திண்டுக்கல் அடுத்துள்ள நத்தவனப்பட்டி பகுதியைச் சேர்ந்தவர் அன்னை இந்திரா(38). இவரது கணவர் பால்ராஜ். இவர்களுக்கு ரட்சகன்(11), மெர்சி(8) என குழந்தைகள் உள்ளனர். அன்னை இந்திரா, திண்டுக்கல் அனைத்து மகளிர் காவல் நிலையத்தில் காவலராக பணிபுரிந்து வந்தார். இதனிடையே கருத்து வேறுபாடு காரணமாக அன்னை இந்திராவிடமிருந்து பிரிந்த பால்ராஜ், தேனி மாவட்டத்தில் தனியாக வசித்து வருகிறார். உடல் நலக் குறைவால் பாதிக்கப்பட்டிருந்த அன்னை இந்திரா, கடந்த அக்டோபர் 16ஆம் தேதி முதல் மருத்துவ விடுப்பில் இருந்து வந்துள்ளார். விடுப்பு முடிந்து அன்னை இந்திரா கடந்த 26ஆம் தேதி பணிக்கு வர வேண்டுமாம். ஆனாலும் அவர் பணிக்கு வராததால் 2 பெண் காவலர்கள் அவரது வீட்டிற்கு விசாரிப்பதற்காக வியாழக்கிழமை சென்றுள்ளனர்.

அப்போது வீடு உள்பக்கமாக பூட்டப்பட்டிருந்த நிலையில், தூர்நாற்றமும் வீசியுள்ளது. இதனால் அதிர்ச்சி அடைந்த பெண் போலீசார், இதுகுறித்து தாடிக்கொம்பு காவல் நிலையத்திற்கு தகவல் தெரிவித்துள்ளனர். அதன்பேரில் சம்பவ இடத்திற்கு சென்ற போலீசார், கதவை தட்டியுள்ளனர். சிறிது நேரத்தில், அன்னை இந்திராவின் அக்கா வாசுகி மற்றும் ஜெபக் கூட்டங்கள் நடத்தி வரும் சுதர்சன்(45) ஆகியோர் கதவை திறந்துள்ளனர். இருவரிடமும் போலீசார் விசாரணை நடத்தியதில், சில நாள்களுக்கு முன்பு அன்னை இந்திரா இறந்துவிட்டதாகவும், உயிர்த்தெழுவார் என்ற நம்பிக்கையில் ஜெபம் செய்து வருவதாகவும் தெரிவித்துள்ளனர்.

இதனால் அதிர்ச்சி அடைந்த போலீசார் வீட்டிற்குள் சென்று பார்த்தபோது, அன்னை இந்திராவின் சடலத்தின் மீது துணிகளை வைத்து மூடி ஜெபம் நடத்தியது தெரிய வந்தது. உயிர்தெழுவார் என்ற நம்பிக்கையில் ஜெபம்:

இதுதொடர்பாக காவல்துறை சார்பில் தெரிவித்ததாவது-அன்னை இந்திரா உடல் நிலை சரியில்லாத காரணத்தால், கட்டாய ஓய்வு எடுத்துக் கொள்வதாக தெரிவித்தார். ஆனாலும், அவருக்கு கட்டுப்பாட்டு அறையில் மாற்றுப் பணி வழங்கப்பட்டிருந்தது. உடல் நிலை சரியில்லாத அன்னை இந்திராவுக்கு, ஜெபக் கூட்டங்கள் நடத்தி வரும் எரியோடு வெள்ளனம்பட்டியைச் சேர்ந்த சுதர்சன் என்பவருடன் பழக்கம் ஏற்பட்டுள்ளது. கடந்த 5 மாதங்களாக அன்னை இந்திராவுடன் சுதர்சனனும் தங்கியிருந்துள்ளார்.

இதனிடையே அன்னை இந்திராவின் உடல் நலம் மேலும் பாதிக்கப்பட்டதை அடுத்து, வாடிப்பட்டியிலுள்ள அவரது அக்கா வாசுகி என்பவருக்கு தகவல் தெரிவித்துள்ளனர். அதன்பேரில் கடந்த 1 மாதமாக வாசுகியும், அன்னை இந்திரா வீட்டிலேயே தங்கியிருந்து கவனித்து வந்துள்ளார். இந்நிலையில் கடந்த 7ஆம் தேதி அன்னை இந்திரா இறந்துவிட்டதாகவும், அவர் மீண்டும் உயிர்தெழுந்து வருவார் என்ற நம்பிக்கையில் ஜெபம் செய்து வந்ததாகவும் வாசுகி மற்றும் சுதர்சனன் ஆகியோர் தெரிவித்தனர். அன்னை இந்திராவின் சடலத்தை வீட்டிலேயே பிரேத பரிசோதனை செய்த மருத்துவர் குழுவும், அவர் 10 நாள்களுக்கு முன்னதாக உயிரிழந்திருக்கலாம் என தெரிவித்துள்ளது. அதன்பேரில் விசாரணை மேற்கொள்ளப்பட்டு வருகிறது என தெரிவித்தனர்.

ஜம்மு-காஷ்மீரில் பாகிஸ்தான் ராணுவத்தினா் இன்று அத்துமீறித் தாக்குதல்

ஜம்மு-காஷ்மீரில் எல்லைக் கட்டுப்பாட்டுக் கோட்டையொட்டி பாகிஸ்தான் ராணுவத்தினா் இன்று அத்துமீறித் தாக்குதல் நடத்தினா்.

ஜம்மு-காஷ்மீரின், ரஜோரி மாவட்டம், நவ் சேரா செக்டாரில் உள்ள எல்லைக் கட்டுப்பாட்டுக் கோட்டையொட்டிய பகுதிகளில் பாகிஸ்தான் ராணுவத்தினா் துப்பாக்கிச்சூடு நடத்தியும், சிறிய ரக பீரங்கிகள் மூலமாக குண்டுகளை வீசியும் இன்று தாக்குதல் நடத்தினா்.

அவா்களுக்கு இந்திய ராணுவத்தினா் தக்க பதிலடி அளித்தனா். இந்த தாக்குதலில் இந்திய வீரா்கள் காயமடைந்ததாகவோ, பலியானதாகவோ தகவல் வெளியாகவில்லை.

முன்னதாக கடந்த 24ஆம் தேதி பூஞ்ச் மாவட்டத்தின் கிருஷ்ண காதி செக்டரில் உள்ள எல்லைக் கட்டுப்பாட்டுப் பகுதியில் பாகிஸ்தான் ராணுவம் தாக்குதல் நடத்தியது குறிப்பிடத்தக்கது.

பாமகவினர் திண்ணை பிரச்சாரம் மேற்கொள்ள வேண்டும்.... கனவு கனவாகவே போகுமா.... ராமதாஸ் தொண்டர்கள் மத்தியில் வேதனை

பாமக பொதுக் குழு கூட்டம் அதன் நிறுவனர் ராமதாஸ் தலைமையில் இணைய வழியில் இன்று நடைபெற்றது. பாமக மாநிலத் தலைவர் ஜி.கே.மணி, இளைஞரணித் தலைவர் அன்புமணி மற்றும் கட்சியின் மாநில, மாவட்ட, ஒன்றிய, நகர நிர்வாகிகள் பங்கேற்றனர். 2021ம் ஆண்டு சட்டமன்ற தேர்தலில் பாமகவின் நிலைப்பாடு குறித்து இந்தக் கூட்டத்தில் ஆலோசிக்கப்பட்டது. 

அப்போது ராமதாஸ் பேசுகையில்;- பாமகவை ஆரம்பித்து 31 ஆண்டுகள் ஆகிவிட்ட போதிலும் இன்று நம்மிடம் ஒரு சட்டமன்ற உறுப்பினர், மக்களவை உறுப்பினர் கூட இல்லை. கட்சி தொடங்கிய நான்கு மாதங்களில் நடந்த மக்களவைத் தேர்தலில் 6.5 சதவிகிதம் வாக்குகளைப் பெற்றோம். ஆனால், இப்போது 5.6 சதவிகிதம் என்ற அளவில் நம் வாக்கு வங்கி இருக்கிறதென சுட்டிக்காட்டினார்.

உங்களை சரியாக வழிநடத்தத் தவறிவிட்டதுதான் இதற்கு காரணமோ என்று கூட நான் சில சமயங்களில் நினைப்பது உண்டு. அனைத்து விதத்திலும் பயிற்சி கொடுத்துவிட்டேன். அப்படி என்றால் கோளாறு நிர்வாகிகளாகிய உங்களிடம்தான் இருக்கிறது. அன்புமணி 2016 தேர்தலில் பென்னாகரம் தொகுதியில் தோல்வியடைந்தார். கடந்த மக்களவைத் தேர்தலில் தருமபுரி தொகுதியில் தோற்றார். இதற்குக் காரணம் நீங்கள்தான். நிர்வாகிகள் சரிவர தேர்தல் பணியாற்றாததுதான் என்று குற்றம்சாட்டினார்.

தேர்தலில் தனியாக நின்று 25 தொகுதிகளில் வெற்றி பெறாவிட்டால் ஏன் கட்சி நடத்த வேண்டும்? அரசியல் மாற்றம் என்ற எனது நீண்ட நாள் கனவு கனவாகவே போகுமோ? என்னுடைய வாழ்க்கையில் அரசியல் மாற்றத்தை காண முடியாதா? என உருக்கமாக பேசினார். மேலும், ஆர்எஸ்எஸ் அமைப்பினர் கண்ணுக்குத் தெரியமால் தேர்தல் வேலைகளைச் செய்வார்கள். அந்த அமைப்பை போல் பாமகவினர் திண்ணை பிரச்சாரம் மேற்கொள்ள வேண்டும்  என தெரிவித்துள்ளார்.

நியூசிலாந்து, ஆஸ்திரேலியாவில் 2021 புத்தாண்டு பிறந்தது. அந்நாட்டுமக்கள் உற்சாகத்துடன் வரவேற்றனர்.

நியூசிலாந்தில் 2021 ஆம் ஆண்டு புத்தாண்டு பிறந்தது. நியூசிலாந்து ஆக்லாந்து நகரில் கூடியிருந்த பொதுமக்கள் 2021 ஆம் ஆண்டை மகிழ்ச்சியுடன் வரவேற்றனர். 2021 ஆம் ஆண்டை வரவேற்கும் வகையில் அங்கு வானவேடிக்கைகள் நிகழ்ந்தன.

இந்நிலையில் 2021 -புத்தாண்டு முதன்முறையாக நியூசிலாந்தில் பிறந்தது. இந்திய நேரப்படி இன்று மாலை நியூசிலாந்தின் ஆக்லாந்து, வெலிங்டன் ஆகிய நகரங்களில் நள்ளிரவு 12 மணி ஆனவுடன் அந்நாட்டு மக்கள் ஆட்டம், பாட்டம், வானவேடிக்கையுடன், கண்ணை கவரும் வகையில் நடைபெற்ற நிகழ்ச்சிகளுடன் கோலாகலமாக புத்தாண்டை வரவேற்று மகிழ்ந்தனர்.

இதே போன்று ஆஸ்திரேலியாவிலும் 2021 புத்தாண்டு பிறந்தது.சிட்னி துறைமுகம் அருகே கண்ணை கவரும் வான வேடிக்கை , இசை நிகழ்ச்சிகளுடன் சிட்னிவாசிகள் ஒன்று கூடி 2021-ம் ஆண்டு புத்தாண்டை ஆடிப்பாடி வரவேற்றனர்.

திருநெல்வேலியில் மின்னணு வாக்குப்பதிவு இயந்திரங்கள் சரிபார்ப்பு பணிகள் மாவட்ட ஆட்சியர் வே. விஷ்ணு தொடங்கி வைத்தார்.

திருநெல்வேலி அருகே ராமையன்பட்டியிலுள்ள வேளாண்மை விற்பனை குழு கிட்டங்கியில் சட்டப்பேரவை தேர்தலுக்கு பயன்படுத்த வைக்கப்பட்டுள்ள மின்னணு வாக்குப்பதிவு இயந்திரங்கள், கட்டுப்பாட்டு இயந்திரங்கள் மற்றும் விவிபாட் இயந்திரங்களை, அங்கீகரிக்கப்பட்ட அரசியல் கட்சிகளின் பிரதிநிதிகள் முன்னிலையில் முதல்நிலையில் சரிார்க்கும் பணிகள் தொடங்கப்பட்டுள்ளது.

இப்பணிகளை தொடங்கி வைத்தபின் கூறியதாவது:

சட்டப்பேரவை தேர்தலுக்காக மஹாராஷ்டிரா மாநிலம், அகமதாநகர் மாவட்டத்திலிருந்து 1020 வாக்குப்பதிவு இயந்திரம், 2280கட்டுப்பாட்டு இயந்திரங்கள் 2430 விவிபாட் மற்றும் ஜால்னா மாவட்டத்திலிருந்து 210 கட்டுப்பாடு இயந்திரம்,280 விவிபாட் இயந்திரங்கள் திருநெல்வேலி மாவட்டத்திற்கு ஒதுக்கீடு செய்யப்பட்டது. ஒதுக்கீடு செய்யப்பட்ட வாக்குப்பதிவு இயந்திரங்களில் முதல்நிலை சரிபார்க்கும் பணிகள் நடைபெறுகிறது.

பெல் நிறுவன 6 பொறியாளர்கள் மூலம் வாக்குப்பதிவு இயந்திரங்களில் முதல்நிலை சரிபார்க்கும் நடைபெறுகிறது. ஜனவரி மாதம் 2-ம் வாரத்துக்குள் முதல்கட்ட சரிபார்க்கும் பணிகள் முடிக்கப்படும். இங்கு 24 மணிநேரம் கண்காணிப்பு கேமிரா மூலம் கண்காணிக்கப்படுகிறது. அத்துடன் போலீஸாரும் பாதுகாப்பு பணியில் ஈடுபடுகிறார்கள் என்று தெரிவித்தார்.

திருநெல்வேலி சார் ஆட்சியர் வி.சிவகிருஷ்ணமூர்த்தி, மாவட்ட ஆட்சியரின் நேர்முக உதவியாளர்கள் எம்.கணேஷ்குமார், ந.சாந்தி, தேர்தல் வட்டாட்சியர் ஆர்.கந்தப்பன், திருநெல்வேலி வட்டாட்சியர் ஆர்.பகவதி பெருமாள் உள்ளிட்டோர் உடனிருந்தனர்.

சி.பி.எஸ்.இ., 12 மற்றும் 10-ம் வகுப்பு பொதுத் தேர்வுகள் 2021 மே 4-ல் தொடங்கி ஜூன் 10-ல் முடிவடையும் : அமைச்சர் ரமேஷ் பொக்ரியால்

மாநிலங்களில் தொற்றுநோய்களின் நிலைமையை ஆராய்ந்த பின்னரே தேர்வு தேதிகள் முடிவு செய்யப்படும், வழக்கமான முறையிலேயே தேர்வு நடைபெறும், ஆன்லைன் முறையில் இருக்காது என அறிவித்திருந்தார்.

இந்நிலையில் டுவிட்டர் நேரலையில் சி.பி.எஸ்.இ., பொதுத் தேர்வு தேதிகளை அமைச்சர் ரமேஷ் பொக்ரியால் வெளியிட்டார். செயல்முறை தேர்வுகள் மார்ச் முதல் தேதி தொடங்கும். எழுத்துத் தேர்வு மே 4 தொடங்கி ஜூன் 10-ல் முடியும் என கூறினார். தேர்வு முடிவுகள் ஜூலை 15 அன்று வெளியிடப்படும் என்றார். விரிவான அட்டவனை இணையதளத்தில் விரைவில் பதிவேற்றப்படும்.

தொற்றுநோயினால் ஒரே நாளில் ஆன்லைன் வகுப்பறைக்கு மாறினோம். ஆசிரியர்களின் உதவியால் இது நடந்தது. இணையம் மற்றும் ஸ்மார்ட்போன்கள் இல்லாத மாணவர்களுக்கு உதவ, “ஒரு வகுப்பு ஒரு சேனல்” அறிமுகப்படுத்தப்பட்டது. மாணவர்களின் தொடர்ச்சியான ஆதரவிற்கும் ஒத்துழைப்பிற்கும் நன்றி என்றும் கூறினார்.

சட்டமன்ற தேர்தல் தேதி அறிவிப்புக்கு பின்புதான் பள்ளிகள் பொதுத்தேர்வு குறித்து அட்டவணை வெளியீடு

ஈரோடு மாவட்டம், சத்தியமங்கலத்தில் இன்று செய்தியாளர்களிடம் பேசிய அவர்;- சட்டப்பேரவைத் தேர்தல் வரும்போது கால அட்டவணையைத் தேர்தல் ஆணையம் வெளியிடும். அந்த அட்டவணை வெளியான பிறகு, தேர்வுகளை நடத்துவது குறித்து முதல்வரிடமும் கல்வியாளர்களிடமும் கலந்து பேச உள்ளோம். அதன்பிறகு பொதுத் தேர்வு அட்டவணை வெளியிடப்படும். மலைப்பகுதிகளில் தடை நீக்கப்பட்டு இலவச வீட்டுமனை பட்டா ஜனவரி மாத இறுதிக்குள் வழங்கப்படும்.

மருத்துவக் கல்லூரியில் அரசுப் பள்ளி மாணவர்களுக்கு வழங்கப்பட்டுள்ள உள் ஒதுக்கீட்டை 10 சதவீதமாக உயர்த்துவது குறித்து முதல்வர் பரிசீலிப்பார். ஜனவரி 6, 7 ஆகிய தேதிகளில் முதல்வர் பழனிசாமி ஈரோட்டில் பயணம் மேற்கொள்ள உள்ளார்'' என்று அமைச்சர் செங்கோட்டையன் தெரிவித்தார். 

சுகாதார சவால்கள் நிறைந்ததாக 2020 இருந்தது, சுகாதாரத் தீர்வுகள் அளிப்பதாக 2021 இருக்கும் என பிரதமர் மோடி நம்பிக்கை

குஜராத் மாநிலம் ராஜ்காட்டில் எய்ம்ஸ் மருத்துவமனை அமைப்பதற்கு காணொலி மூலம் பிரதமர் நரேந்திர மோடி இன்று அடிக்கல் நாட்டினார். மத்திய அமைச்சர் ஹர்ஷ்வர்த்தன், குஜராத் ஆளுநர் ஆச்சார்ய தேவ்ரத், குஜராத் முதல்வர் திரு விஜய் ரூபானி ஆகியோரும் இந்த நிகழ்ச்சியில் கலந்து கொண்டனர்.

நிகழ்ச்சியின் போது பேசிய பிரதமர், கொரோனா காலத்தில் பொது மக்களைக் காப்பாற்றுவதற்காக தங்கள் உயிரைப் பணயம் வைத்து முன்களத்தில் நின்று பணியாற்றி வரும் 9 மில்லியன் டாக்டர்கள், சுகாதார அலுவலர்கள், தூய்மைப் பணியாளர்கள் உள்ளிட்டோரின் பங்களிப்பை நினைவுகூர்ந்தார். விஞ்ஞானிகளின் முயற்சிகளை அவர் பாராட்டினார். 

சிரமமான இந்த காலக்கட்டத்தில் ஏழைகளுக்கு முழு அர்ப்பணிப்புடன் உணவளித்த அனைவருக்கும் அவர் பாராட்டு தெரிவித்தார்.

இந்தியா ஒன்றுபட்டு நின்றால் மிக மோசமான நெருக்கடிகளையும் திறமையாக சமாளிக்க முடியும் என்பதை இந்த ஆண்டு நிரூபித்துள்ளது என்று பிரதமர் குறிப்பிட்டார். சிறந்த நடவடிக்கைகள் காரணமாக, கொரோனா காலத்தில் எண்ணற்ற உயிர்களை காப்பாற்றியதில் உலக அளவில் இந்தியா முதலிடத்தில் உள்ளது என்று அவர் தெரிவித்தார். தடுப்பு மருந்து அளிப்பதற்குத் தேவையான அனைத்து நடவடிக்கைகளும் மேற்கொள்ளப்படுவதாக அவர் கூறினார்.

இந்தியாவில் தயாரிக்கும் தடுப்பு மருந்துகள், நாட்டின் மூலைமுடுக்கெல்லாம் சரியான முறையில் சென்று சேருவதை உறுதி செய்யும் பணிகள் இறுதிக் கட்டத்தில் இருப்பதாக அவர் குறிப்பிட்டார். உலகின் மிகப் பெரிய அளவில் தடுப்பூசி மருந்து அளிக்கும் திட்டத்தை நடைமுறைப்படுத்த முழு வேகத்தில் பணிகள் நடந்து வருவதாக அவர் தெரிவித்தார். முடிவடையும் ஆண்டில் நோய்ப் பரவலைத் தடுப்பதில் வெற்றி கண்டதைப் போல, தடுப்பூசி போடும் இயக்கத்தையும் வெற்றிகரமாக செயல்படுத்த அனைவரும் ஒன்றுபட வேண்டும் என்று அவர் கேட்டுக் கொண்டார்.

ராஜ்கோட் எய்ம்ஸ் மருத்துவமனை மூலம் சுகாதாரக் கட்டமைப்பு, மருத்துவக் கல்வி வசதிகள் பெருகுவதுடன், குஜராத்தில் வேலைவாய்ப்புகளும் பெருகும் என்று மோடி கூறினார். நேரடியாக 5 ஆயிரம் பேருக்கும், மறைமுகமாக அதே அளவிலும் வேலைவாய்ப்புகள் உருவாகும் என்றார்.

கோவிட் பாதிப்புக்கு எதிராக குஜராத்தில் மேற்கொள்ளப்பட்ட நடவடிக்கைகளைப் பாராட்டிய அவர், இந்த விஷயத்தில் குஜராத் மாநிலம் வழிகாட்டியாக இருந்துள்ளது என்று குறிப்பிட்டார். குஜராத்தில் உள்ள மருத்துவக் கட்டமைப்பு வசதிகள், கொரோனா சவாலை எதிர்கொள்வதில் குஜராத்தின் சிறப்பான அணுகுமுறை ஆகியவை பற்றியும் மோடி பாராட்டு தெரிவித்தார். மருத்துவத் துறையில் குஜராத்தின் இந்த வெற்றிக்கு, இரண்டு பத்தாண்டு கால ஓய்வற்ற உழைப்பு, அர்ப்பணிப்பு, உறுதி ஆகிய பின்னணிகள் இருப்பதாக அவர் கூறினார்.

இதற்கு முன்னர், இந்தியாவில் 6 எம்ய்ஸ் மருத்துவமனைகள் மட்டுமே உருவாக்கப்பட்டு இருந்தன. அட்டல் பிகாரி வாஜ்பாய் அவர்கள் காலத்தில் 2003 ஆம் ஆண்டில் மேலும் 6 எய்ம்ஸ் மருத்துவமனைகள் தொடங்க நடவடிக்கைகள் எடுக்கப்பட்டன. கடந்த 6 ஆண்டுகளில் 10 புதிய எய்ம்ஸ் மருத்துவமனைகளுக்கான பணிகள் தொடங்கியுள்ளன. இந்த எய்ம்ஸ் மருத்துவமனைகளுடன், 20 சூப்பர் ஸ்பெஷாலிட்டி மருத்துவமனைகளும் உருவாக்கப் படுகின்றன என்று பிரதமர் தெரிவித்தார்.

2014 ஆம் ஆண்டுக்கு முன்புவரையில், நமது சுகாதாரத் துறையின் பல்வேறு செயல்பாடுகள் வெவ்வேறு திசைகளில் சென்று கொண்டிருந்தன என்றும், 2014-க்குப் பிறகு, முழுமையான ஒருங்கிணைப்புடன் செயல்பட்டதால் நோய்த் தடுப்புக்கு முக்கியத்துவம் அளிக்கப்பட்டு, நவீன சிகிச்சை வசதிகளை உருவாக்க முன்னுரிமை அளிக்கப்பட்டது என்றும் பிரதமர் தெரிவித்தார். ஏழைகளுக்கான சிகிச்சை செலவைக் குறைக்கவும், அதேசமயத்தில் மருத்துவர்களின் எண்ணிக்கையை அதிகரிக்கவும் அரசு நடவடிக்கைகள் எடுத்துள்ளது என்றும் அவர் கூறினார்.

ஆயுஷ்மான் பாரத் திட்டத்தின் கீழ், தொலைதூரப் பகுதிகளில் 1.5 மில்லியன் சுகாதார மற்றும் நலன் மையங்களை உருவாக்கும் பணிகள் மேற்கொள்ளப்பட்டுள்ளது. அவற்றில் ஏற்கெனவே 50 ஆயிரம் மையங்கள் செயல்படத் தொடங்கிவிட்டன என்று பிரதமர் தெரிவித்தார். அவற்றில் குஜராத்தில் மட்டும் 5 ஆயிரம் மையங்கள் உள்ளன என்றார் அவர். சுமார் 7000 மக்கள் மருந்தக மையங்கள் மூலம், 3.5 லட்சம் ஏழைகள் குறைந்த விலைகளில் மருந்துகள் வாங்கியுள்ளனர். மக்களின் ஆரோக்கியத்தை மேம்படுத்த அரசு மேற்கொண்டுள்ள பல்வேறு முயற்சிகளைப் பிரதமர் பட்டியலிட்டார்.

2020 ஆம் ஆண்டு சுகாதார சவால்கள் நிறைந்ததாக இருந்தது என்றால், 2021 ஆம் ஆண்டு சுகாதாரப் பிரச்சினைகளுக்குத் தீர்வுகளை அளிப்பதாக இருக்கும் என்று பிரதமர் நரேந்திர மோடி நம்பிக்கை தெரிவித்தார். சிறப்பான விழிப்புணர்வு மூலமாக சுகாதாரத் தீர்வுகளை நோக்கி உலகம் பயணிக்கும். 2020 சுகாதார சவால்களை சிறப்பாக எதிர்கொண்டதைப் போல, சுகாதாரத் தீர்வுகள் அளிப்பதில் 2021-ல் இந்தியா முக்கிய பங்காற்றும் என்றும் அவர் தெரிவித்தார்.

இந்திய மருத்துவ நிபுணர்களின் திறமை, சேவை மனப்பான்மை, அதிக அளவில் தடுப்பு மருந்துகள் அளிப்பதில் உள்ள அனுபவம் ஆகியவற்றின் அடிப்படையில், உலகிற்கு சிறந்த மற்றும் சிக்கனமான தீர்வுகளை நம்மால் அளிக்க முடியும் என்று பிரதமர் கூறினார். சுகாதாரத் துறை சார்ந்த ஸ்டார்ட் அப் நிறுவனங்கள், சுகாதாரத் தீர்வுகள் மற்றும் தொழில்நுட்பத்தை ஒருங்கிணைத்து செயல்படுவதால், எல்லோருக்கும் சுகாதார சேவை கிடைக்கச் செய்ய முடியும். ``எதிர்கால ஆரோக்கியம் மற்றும் ஆரோக்கியத்தின் எதிர்காலத்தில் இந்தியா முக்கிய பங்காற்றப் போகிறது'' என்று திரு. மோடி கூறினார்.

நோய்கள் இப்போது உலக அளவில் பரவும்நிலையில், உலக அளவில் சுகாதாரத் தீர்வுகள் காண்பதற்கு ஒருங்கிணைந்த முயற்சிகள் தேவைப்படுவதாக அவர் குறிப்பிட்டார். தேவைக்கு ஏற்ப தீர்வுகளை அளித்து இந்தியா தனது செயல்திறனை நிரூபித்துள்ளது. உலக ஆரோக்கியத்தின் மையமாக இந்தியா உருவாகி வருகிறது. 2021ல் நாம் இதை மேலும் பலப்படுத்த வேண்டும் என்று பிரதமர் வலியுறுத்தினார்.

அதிமுக அரசின் சாதனைகள் பல விதம்...! தொடரும் சாதனை.....

திருமண உதவித் திட்டங்கள், விவசாயிகளுக்கான பயிர்க் கடன்கள், மின்கட்டண சலுகை என 2016-ம் ஆண்டு தேர்தல் அறிக்கையின் போது அளித்த வாக்குறுதிகளில் சிலவற்றை அதிமுக அரசு நிறைவேற்றி உள்ளது.

சமூக நலத் திட்டங்களை செயல்படுத்துவதில் தமிழகம் எப்போதும் முன்னோடி மாநிலமாக உள்ளது. பிறப்பு முதல் இறப்பு வரை அரசு அனைத்து உதவிகளையும் செய்கிறது என்கிற அளவுக்கான திட்டங்கள் நடைமுறைப்படுத்தப்பட்டுள்ளன.

உதாரணமாக 2016 அதிமுக தேர்தல் அறிக்கையை மறைந்த முதல்வர் ஜெயலலிதா வெளியிட்டிருந்தார். அந்த தேர்தல் அறிக்கையில், திருமண உதவித் திட்டத்தின் கீழ் வழங்கப்படும் தாலிக்கு தங்கம் திட்டத்தில் 4 சவரன் என்பது 8 சவரனாக உயர்த்தப்படும் என கூறியிருந்தார்.

இது வெற்றிகரமாக தமிழகத்தில் நடைமுறைப்படுத்தப்பட்டு வருகிறது. 10-ம் வகுப்பு முடித்த பெண்களுக்கு 8 கிராம் தங்கம், ரூ25,000 நிதி உதவி; பட்டம் அல்லது டிப்ளமோ படித்த பெண்களுக்கு 8 கிராம் தங்கம் ரூ50,000 வழங்கப்படுகிறது.

கருவுற்ற தாய்மார்களுக்கு வழங்கப்படும் நிதியுதவி 12,000 ரூபாயிலிருந்து 18,000 ரூபாயாக உயர்த்தி வழங்கப்பட்டு வருகிறது. பிறக்கின்ற குழந்தைகளுக்கான அனைத்து பொருட்களையும் உள்ளடக்கிய அம்மா பெட்டகம் வழங்கப்படுகிறது.

இதேபோல் சத்துணவுத் திட்டத்தில் மேம்பாடு, விவசாயிகளுக்கான குளிர்பதன கிடங்குகள், மருத்துவ கல்லூரிகள் என பல்வேறு திட்டங்களை செயல்படுத்தி வருகிறது தமிழக அரசு.

2016-ம் ஆண்டு அதிமுக தேர்தல் அறிக்கையில் இடம்பெற்ற முக்கிய அம்சங்கள் இங்கே கொடுத்துள்ளோம். எவற்றை எல்லாம் அதிமுக அரசு நடைமுறைப்படுத்தி இருக்கிறது என்பதை வாசகர்களே தீர்மானித்து கொள்ளலாம்.

2016-ம் ஆண்டு அதிமுக தேர்தல் அறிக்கை அம்சங்கள்:

• அனைத்து குடும்ப அட்டைதாரர்களுக்கும் கைப்பேசி (cellphone) விலையின்றி வழங்கப்படும்.
• வங்கிகளில் கல்விக் கடன் பெற்று வேலையில்லாமல் உள்ளவர்களின் கல்விக் கடனை அரசே திரும்பச் செலுத்தும்.
• சமூக நலத்திட்டத்தின் கீழ், தொடக்கப் பள்ளி குழந்தைகளுக்கு சத்துணவு திட்டத்தின் கீழ் காலை சிற்றுண்டி வழங்கப்படும்.
• மகளிர் மற்றும் குழந்தைகள் நலன் பேணும் வகையில் வைட்டமின் A வைட்டமின் D மற்றும் இரும்புச் சத்துகள் செறிவூட்டப்பட்ட (Fortified) ஆவின் பால் 1 லிட்டர் 25 ரூபாய் என குறைந்த விலையில் வழங்கப்படும்
• திருமண உதவித் திட்டங்களின் கீழ் உதவித் தொகையுடன் வழங்கப்படும் தங்கம் 4 கிராம் என்பதிலிருந்து
• 1 சவரன் (8 கிராம்) ஆக உயர்த்தி வழங்கப்படும்.
• அங்கன்வாடி மையங்கள் அனைத்துக்கும் எரிவாயு இணைப்புடன் கூடிய அடுப்பு, பிரஷர் குக்கர் ஆகிய உபகரணங்கள் வழங்கப்படும்.
• நகர்ப்புறங்களில் உள்ள அங்கன்வாடி மையங்கள் மழலையர் பராமரிப்பகங்களாக தரம் உயர்த்தப்படும்
• திருநங்கையர் மற்றும் திருநம்பியர் நலத் திட்டங்கள் செயல்படுத்தப்படும்
• கட்டணமில்லா மின்சாரம் வழங்கும் திட்டத்தின் கீழ், தற்போதைய கணக்கீட்டு முறைப்படி 100 யூனிட் மின்சாரம் கட்டணம் ஏதுமில்லாமல் வீடுகளுக்கு வழங்கப்படும்.
• கூட்டுறவு வங்கிகளுக்கு சிறு, குறு விவசாயிகள் செலுத்த வேண்டிய பயிர்க்கடன், நடுத்தர காலக் கடன் மற்றும் நீண்ட காலக் கடன் ஆகிய அனைத்தும் தள்ளுபடி செய்யப்படும்.
• 2016 முதல் 2021 வரையிலான 5 ஆண்டு காலத்தில் 40,000 கோடி அளவிற்கு பயிர்க் கடன் கூட்டுறவு வங்கிகள் மூலம் வழங்கப்படும்.
• மானாவாரி பயிர் சாகுபடியில் கறவை மாடுகள், ஆடுகள் வளர்ப்பு, ஒருங்கிணைந்த பண்ணையத் திட்டம் தற்போது செயல்படுத்தப்பட்டு வருகிறது. இந்த திட்டம் மேலும் விரிவாக்கப்படும்.
• தரிசு நிலங்கள் சீர்திருத்தப்பட்டு, நீராதார அமைப்புகள் ஏற்படுத்தப்பட்டு, பயிர் செய்ய வழிவகை காணப்படும்
• தோட்டக்கலை விவசாயிகளுக்கு அவர்களது விளைபொருட்களுக்கு நல்ல விலை கிடைப்பது உறுதி செய்யப்படும்.
• அச்சு மற்றும் ஆரம் மாதிரி (hub and spoke model) தோட்டக்கலை மற்றும் வேளாண் விற்பனை துறைகள் மூலம் திட்டமிடப்பட்டு, முதல் கட்டமாக 10 சேகரிப்பு மையங்கள் ஏற்படுத்தப்பட்டுள்ளன. இந்த திட்டம் விரிவாக்கப்படும். வாழை, இளநீர், மாம்பழம், திராட்சை மற்றும் காய்கறிகள் ஆகியவற்றிற்கென சிறப்பு வணிக வளாகங்கள் ஏற்படுத்தப்படும்.
• சூரிய சக்தியால் இயங்கும் விவசாய மோட்டார் பம்பு செட்டுகளுக்கு 80 சதவீத மானியம் தொடர்ந்து வழங்கப்படும்.
• 10 எச்பி வரையிலான மோட்டார் பம்பு செட்டுகளுக்கு மானியம் வழங்கப்படும்.
• விவசாயிகள் பயன் பெறும் வகையில் கிடங்குகள் மற்றும் குளிர் பதனக் கிடங்குகள் அமைக்கப்படும்.
• மரபணு மாற்றம் செய்யப்பட்ட பயிர்களுக்கு அனுமதி வழங்கப்பட மாட்டாது.
• விவசாயிகளுக்கு தொடர்ந்து கட்டணமில்லா மின்சாரம் வழங்கப்படும்
• டெல்டா மாவட்டங்கள் மற்றும் இதர விவசாயப் பகுதிகளில் மீத்தேன் எரிவாயுத் திட்டம், ஷேல் எரிவாயுத் திட்டம் போன்ற விவசாயிகளை பாதிக்கக் கூடிய எந்த திட்டமும் அனுமதிக்கப்படமாட்டாது.
• விவசாய நிலங்கள் வழியே எரிவாயு குழாய்கள் எடுத்துச் செல்வது அனுமதிக்கப்படமாட்டாது.
• விவசாயிகள் விளைபொருட்களுக்கு உரிய விலை கிடைக்கச் செய்யும் வகையில் அனைத்து ஒழுங்குமுறை விற்பனைக் கூடங்களும் கணினிமயமாக்கப்பட்டு மின்னணு ஏலமுறை (e-Tender) இணையதள வசதிகள் ஏற்படுத்தப்படும். விளைபொருட்களின் சந்தை விலை நிலவரம் குறித்த 'குறுஞ்செய்தி' சேவை விவசாயிகளுக்கு வழங்கப்படும்.
• நெல்லுக்கான ஆதார விலை உயர்த்தி வழங்கப்படும்.
• கரும்புக்கான மாநில பரிந்துரை விலை உயர்த்தி நிர்ணயம் செய்யப்படும்.
• சர்க்கரை ஆலைகளால் கரும்பு விவசாயிகளுக்கு வழங்கப்பட வேண்டிய தொகைகள் உடனுக்குடன் வழங்க நடவடிக்கை எடுக்கப்படும்.
• கொப்பரை விலை குறையும் போதெல்லாம் விவசாயிகளிடமிருந்து கொப்பரையை வாங்க நடவடிக்கை எடுக்கப்படும்.
• அம்மா முழு உடல் பரிசோதனைத் திட்டம்; அம்மா மகளிர் சிறப்பு முழு உடல் பரிசோதனைத் திட்டம் ஆகியவை அனைத்து மாவட்டங்களுக்கும் விரிவுபடுத்தப்படும்
• ஒவ்வொரு ஆண்டும் ஒரு மருத்துவக் கல்லூரி என்ற அடிப்படையில் 5 புதிய மருத்துவக் கல்லூரிகள் நிறுவப்படும்.
• மருத்துவக் கல்லூரி பொது நுழைவுத் தேர்வு முறை தொடர்ந்து எதிர்க்கப்படும்.
• முதியோர்களுக்கு அனைத்து மருத்துவக் கல்லூரி மருவத்துவமனை மற்றும் மாவட்ட அரசு தலைமை மருத்துவமனைகளில் மூப்பியல் சிகிச்சை மையங்கள் ஏற்படுத்தப்படும்.
• கருவுற்ற தாய்மார்களுக்கு வழங்கப்படும் நிதியுதவி 12,000 ரூபாயிலிருந்து 18,000 ரூபாயாக உயர்த்தி வழங்கப்படும்
• ஏழை, எளிய, நடுத்தர மக்கள் அனைவரும் நிதிச் சேவைகளை பயன்படுத்தும் வகையில் Amma Banking Card வழங்கப்படும் நிதிச் சேவையை உறுதிபடுத்தும் வகையிலும், அதிக வட்டிக்கு தனியாரிடம் பெற்றுள்ள கடன்களை திருப்பி செலுத்தும் வகையிலும், 1,000 ரூபாய் வரை சுலபத் தவணையில் செலுத்தக் கூடிய வட்டியில்லாக் கடன் வழங்கப்படும். வாரம் 10 ரூபாய் என்ற அளவிற்கு திருப்பிச் செலுத்தக்கூடிய அளவில் இந்தக் கடன் அமையும். Amma Banking Card-ஐ பயன்படுத்தி அனைத்து வங்கிப் பரிவர்த்தனைகளை செய்வதோடு, அனைத்து கட்டணங்கள் செலுத்துதல் மற்றும் அரசின் அனைத்து சேவைகளையும் பெறுவதற்கு பயன்படுத்தும் விதமாக இந்த Amma Banking Card சேவை வழங்கப்படும்.
• அனைத்து அரசு சேவைகளும் இணையதளம் மூலம் வழங்கப்படும்.
• இல்லந்தோறும் இணையம் என்னும் சேவை அனைத்துப் பகுதிகளுக்கும் விரிவாக்கம் செய்யப்பட்டு செம்மைப்படுத்தப்படும்
• அரசு கேபிள் டி.வி. இணைப்பு பெற்றுள்ளவர்களுக்கு 'Set-top Box' விலையின்றி வழங்கப்படும்.

தமிழகத்தில் ஜனவரி 31ம் தேதி வரை ஊரடங்கை நீட்டித்து தமிழக அரசு உத்தரவு

தமிழகத்தில் இன்றுடன் (டிச.,31) முடிவடையவுள்ள ஊரடங்கினை ஜன.,31 வரை நீட்டித்து முதல்வர் பழனிசாமி உத்தரவிட்டுள்ளார். இது தொடர்பாக அவர் வெளியிட்ட அறிக்கையில் கூறப்பட்டுள்ளதாவது:

தற்போதுள்ள நோய் பரவல் நிலை மற்றும் வெளிநாடுகளில் உருமாறிய கொரோனா வைரசின் தாக்கம் ஆகியவற்றை கருத்தில் கொண்டு டிச.,31 வரை தமிழகம் முழுவதும் தற்போதுள்ள பொது ஊரடங்கு உத்தரவு, ஏற்கனவே நடைமுறையில் உள்ள பல்வேறு கட்டுப்பாடுகளில் கீழ்க்கண்ட தளர்வுகளுடன், ஜன.,31 வரை மேலும் நீட்டிப்பு செய்யப்படுகிறது. கட்டுப்பாட்டு பகுதி தவிர மற்ற பகுதிகளில் ஏற்கனவே அனுமதிக்கப்பட்ட பல்வேறு தளர்வுகளுடன் கீழ்க்கண்ட பணிகளுக்கு அனுமதி அளிக்கப்படுகிறது.

தளர்வுகள்:

* உள் அரங்கங்களில் மட்டும் 50 சதவீத இருக்கைகள் அல்லது அதிகபட்சம் 200 பேர் பங்கேற்கும் சமுதாய, அரசியல், பொழுதுபோக்கு, விளையாட்டு, கலாச்சார, கல்வி மற்றும் மதம் சார்ந்த கூட்டங்கள் நடத்த அனுமதி.

* திரைப்படம் மற்றும் சின்னத்திரை உட்பட திரைப்பட தொழிலுக்கான படப்பிடிப்புகளுக்கு, பணி செய்யும் நபர்களின் எண்ணிக்கைக்கு உச்ச வரம்பின்றி பணி செய்ய அனுமதி.

* நேரக் கட்டுப்பாடுகளை தளர்த்தி, அனைத்து வழிபாட்டு தலங்களிலும், வழக்கமான நேர நடைமுறைகளை பின்பற்றி பொதுமக்கள் தரிசனத்திற்கு அனுமதி.

கட்டுப்பாடுகள்:

* புதுச்சேரி, ஆந்திரா, கர்நாடகா மாநிலங்களை தவிர தமிழகம் வருபவர்களுக்கு இ-பதிவு முறை தொடரும்.

* மத்திய அரசு அனுமதிக்கப்பட்ட வழித்தடங்களை தவிர, சர்வதேச விமான போக்குவரத்திற்கான தடை தொடரும்.

* நோய் கட்டுப்பாட்டு பகுதிகளில் தற்போதுள்ள நடைமுறைகளின்படி, எந்தவித தளர்வுகளும் இன்றி ஊரடங்கு முழுமையாக கடைபிடிக்கப்படும்.

* காணும் பொங்கல் அன்று மெரினா உள்ளிட்ட அனைத்து கடற்கரைகளிலும் பொதுமக்களுக்கு அனுமதி இல்லை.

இவ்வாறு அதில் தெரிவிக்கப்பட்டுள்ளது.

பள்ளி வகுப்பறையில் 10ம் வகுப்பு மாணவனை துப்பாக்கியால் சுட்டுக்கொலை

உத்தரபிரதேச மாநிலம் புலந்த்ஷாஹர் மாவட்டத்தில் உள்ள பள்ளி ஒன்றில் 10-ம் வகுப்பு படித்து வரும் 14 வயதுடைய இரண்டு மாணவர்கள் பெஞ்சில் உட்காருவதில் தொடர்பாக கடந்த புதன்கிழமை சண்டை போட்டனர். பின்னர் இருவரும் மாலையில் வீட்டுக்கு திரும்பி விட்டனர். ஆனால் அதில் ஒரு மாணவர் அந்த சண்டையை இன்று காலை வரை மனதில் வைத்து இருந்தார். தன்னுடன் சண்டையிட்ட சக மாணவரை கொலை செய்ய திட்டமிட்ட அவர் தனது வீட்டில் இருந்த துப்பாக்கியை புத்தக பையில் மறைத்து வைத்து பள்ளி கூடத்துக்கு எடுத்து சென்றார்.

தொடர்ந்து தீராத ஆத்திரத்தில் இருந்த அந்த மாணவர், தன்னுடன் சண்டையிட்ட மாணவரை வகுப்பறையில் வைத்து 3 முறை துப்பாக்கியால் சுட்டதால் பதற்றம் ஏற்பட்டது. இதில் தலை, மார்பு மற்றும் வயிற்று பகுதியில் குண்டு பாய்ந்த அந்த மாணவர் சம்பவ இடத்திலேயே பரிதாபமாக உயிரிழந்தார். இதற்கிடையே துப்பாக்கியால் சுட்ட மாணவர் அங்கு இருந்து தப்பி செல்ல முயன்றார். சக மாணவர்கள், ஆசிரியர்கள் அவரை பிடிக்க முயன்றபோது வானம் நோக்கி துப்பாக்கியால் சுட்டு அவர்களை மிரட்டினார். ஆனாலும் ஆசிரியர்கள் அந்த மாணவரை மடக்கி பிடித்தனர்.

இது குறித்து தகவல் அறிந்து வந்த போலீசார் துப்பாக்கியால் சுட்ட மாணவரை கைது செய்தனர். அவர் வைத்து இருந்த துப்பாக்கியை பறிமுதல் செய்த போலீசார், அவரது பையில் மற்றோரு நாட்டு துப்பாக்கி இருப்பதையும் கண்டுபிடித்தனர். அந்த மாணவரின் மாமா ராணுவத்தில் பணிபுரிகிறார். அப்போது அவர் விடுமுறையில் வீட்டுக்கு வந்துளளதால், மாணவர் அவரின் துப்பாக்கியை எடுத்து வந்து இந்த படுபாதக செயலை அரங்கேற்றி இருப்பது விசாரணையில் தெரியவந்தது.

இந்து மதத்தை தொடர்ந்து இழிவுபடுத்தும், விசிக தலைவர் திருமாவளவனுக்கு சேலை கட்டுவேன் : வேலூர் இப்ராகிம் ஆவேசம்

கோவை காந்திபுரம் பகுதியில் உள்ள பாஜக தலைமை அலுவலகத்தில் வேலூர் இப்ராகிம் செய்தியாளர்களை சந்தித்தார். அப்போது அவர் பேசியது இதுதான்:

"மத நல்லிணக்கம் தமிழ்நாட்டில் நீடித்து வருகிறது... ஆனால் 20 வருஷமாக இந்துக்கள், இஸ்லாமியர்கள் நல்லிணக்கத்திற்கு சில இஸ்லாமிய அடிப்படைவாத இயக்கங்களும் திராவிட அரசியலும் சிதைக்கும் வகையில் ஏற்படுத்துகிறது.

நான் பிரதமரின் திட்டங்களை ஆதரிக்கிறேன்... அதற்காக தமிழகம் முழுவதும் சுற்றுப்பயணம் செய்கிறேன். இதற்காகவே இஸ்லாமியர்களுக்கு எதிரானவராக என்னை சித்தரிக்கிறார்கள்.. இந்து மதத்தை இழிவுபடுத்தி விட்டு, பிற மதங்களை புகழ்ந்து திருமாவளவன் பேசுகிறார்...

மத நல்லிணக்கத்தை நாங்கள் முன்னெடுக்கும் போது, விடுதலை சிறுத்தைகள் தலைவர் திருமாவளவன் இந்துக்களுக்கு எதிராக அரசியல் செய்து கொண்டிருக்கிறார்... பெரியார் செய்த காரியத்தைத்தான் திருமாவளவனும் செய்கிறார்.

இஸ்லாமிய அமைப்பான எஸ்டிபிஐ மத வெறித்தனத்தை வெளிப்படுத்தி வருகிறது... இதுபோன்ற அமைப்புகளோடு திருமாவளவன் கொஞ்சுகிறார்... இந்து மதத்தில் உள்ள குறைகளை சுட்டிக்காட்டுவது போல், இஸ்லாமிய அமைப்புகள் செய்யும் தவறுகளையும் தட்டிக் கேட்க வேண்டும். இனியும் இதனை செய்தால் திருமாவளவனுக்கு சேலை கட்டும் போராட்டம் நடத்தப்படும்.

திருமாவளவன் கட்சியினர் எங்களை மாவட்டத்திற்குள் விடமாட்டேன் என்கின்றனர். இது பாரத தேசம், பாகிஸ்தான் இல்லை... எனது பிரச்சாரத்தை தொடங்குவேன்.. எனது பிரச்சாரம் மத நல்லிணக்கத்தை அடிப்படையாகக் கொண்டிருக்கும். மத்திய அரசின் பல திட்டங்களை அதிமுக ஆதரித்துள்ளது. ஆனால், அனைத்து திட்டங்களையும் ஸ்டாலின் எதிர்க்கிறார்... வெறும் அரசியல் லாபத்திற்காகச் செய்கின்றனர்.

வாக்குவங்கிக்காக இவர்கள் மோசமான அரசியல் செய்கின்றனர் என்பதை இஸ்லாமிய மக்கள் புரிந்து கொள்ள வேண்டும்... திராவிட அரசியல் என்பது மக்களை போலியான தவறான முறையில் வாக்குறுதிகளை அளித்து, தமிழகத்தில் தேச நலனைப் பற்றி பேசுபவர்களை நகைச்சுவையாளராக மாற்றியுள்ளனர். தமிழகத்தில் தேசியத்தை மையப்படுத்தும் ஆட்சி வர வேண்டும். திமுகவை ஒழிக்க வேண்டும் என்றால் அதிமுகவுடனான கூட்டணி மட்டுமே சாத்தியமாகும். வரும் காலங்களில் பாஜக தமிழகத்தில் சொந்தக்காலில் நிற்கும்" என்றார்.

மீண்டும் ஜெயலலிதாவின் ஆட்சி நடைபெற வேண்டுமெனில் சட்டப்பேரவையில் அதிமுகவுக்கு பெரும்பான்மை வேண்டும்.

திருச்சி மாவட்டத்தில் 2-வது நாளாக இன்று அதிமுக இணை ஒருங்கிணைப்பாளரும் தமிழ்நாடு முதல்வருமான பழனிசாமி தேர்தல் பிரச்சாரம் மேற்கொண்டு வருகிறார்.

இன்று (டிச. 31) பிரச்சாரத்தை தொடங்குவதற்கு முன் ஸ்ரீரங்கம் அருள்மிகு ரங்கநாதர் கோயிலில் வழிபாடு நடத்தச் சென்ற முதல்வர் பழனிசாமிக்கு, ரங்கா ரங்கா கோபுர வாசலில் கோயில் சார்பில் பூரணகும்ப மரியாதை அளிக்கப்பட்டது.

அதைத் தொடர்ந்து, இந்து சமய அறநிலையத் துறை அமைச்சர் சேவூர் எஸ்.ராமச்சந்திரன், கோயில் இணை ஆணையர் பொன்.ஜெயராமன், கோயில் அர்ச்சகர் சுந்தர் பட்டர் உள்ளிட்டோர் வரவேற்றனர்.

கோயிலுக்குள் சென்ற முதல்வர் பழனிசாமி, ரங்க விலாச மண்டப வாயிலில் நின்ற கோயில் யானை ஆண்டாளுக்கு பழங்களை உணவளித்தார்.

யானையிடம் ஆசி பெற்ற பிறகு, கருடாழ்வார், மூலவர் சன்னதி, தாயார் சன்னதி, உடையவர் சன்னதி ஆகிய இடங்களில் வழிபாடு நடத்தினார்.

தொடர்ந்து, கோயில் சார்பில் முதல்வருக்கு மரியாதை செய்யப்பட்டு, பிரசாதம் வழங்கப்பட்டது.

அதைத்தொடர்ந்து, ராஜகோபுரம் அருகே முதல்வர் பழனிசாமி பேசியதாவது:

"மறைந்த முதல்வர் ஜெயலலிதா வென்ற தொகுதி ஸ்ரீரங்கம். அவர் மறைந்தாலும் அவர் செய்த சாதனைகளால் அவரது புகழ் நிலைத்து நிற்கிறது. அவர் முதல்வராக இந்தத் தொகுதி உறுதுணையாக இருந்தது. வரலாற்றுச் சிறப்புமிக்க இந்தத் தொகுதியில் முதல்வராக நான் நின்று பேச வாய்ப்பளித்த இறைவனுக்கு நன்றி.

ரூ.100 கோடியில் கொள்ளிடம் புதிய பாலம், திருவானைக்காவல் மேம்பாலம், வண்ணத்துப்பூச்சி பூங்கா, தேசிய சட்டப் பல்கலைக்கழகம், தோட்டக்கலைக் கல்லூரி, ஸ்ரீரங்கம் வரும் பக்தர்கள் தங்குவதற்காக யாத்திரி நிவாஸ், குடிசை மாற்று வாரியம் மூலம் 400 வீடுகள், ரூ.2,000 கோடியில் தமிழ்நாடு செய்தித்தாள் காகித நிறுவனம் உட்பட ஸ்ரீரங்கம் தொகுதியில் பல்வேறு வளர்ச்சித் திட்டங்களை முதல்வராக இருந்தபோது ஜெயலலிதா செயல்படுத்தினார்.

முக்கொம்பில் உடைந்த கொள்ளிடம் கதவணைக்குப் பதிலாக புதிய கதவணை கட்டும் பணி தற்போது தீவிரமாக நடைபெற்று வருகிறது. இந்தப் பணிகள் 3, 4 மாதங்களில் நிறைவடைந்து பயன்பாட்டுக்கு கொண்டு வரப்படும்.

தமிழ்நாடு செய்தித்தாள் காகித நிறுவனத்தை அமைத்து இளைஞர்களுக்கு வேலைவாய்ப்பை ஏற்படுத்தித் தந்தார் ஜெயலலிதா. தற்போது அந்த ஆலையை ரூ.2,000 கோடியில் தமிழ்நாடு அரசு விரிவுபடுத்ததி வருகிறது.

வளமான, செழிப்பான, அனைத்து அடிப்படைத் தேவைகளும் நிறைந்த பகுதியாக ஸ்ரீரங்கம் தொகுதியை மறைந்த முதல்வர் ஜெயலலிதா உருவாக்கித் தந்தார்.

மீண்டும் ஜெயலலிதாவின் ஆட்சி நடைபெற வேண்டுமெனில் சட்டப்பேரவையில் அதிமுகவுக்கு பெரும்பான்மை வேண்டும்.

2021 சட்டப்பேரவைப் பொதுத் தேர்தலில் ஸ்ரீரங்கம் தொகுதி ஜெயலலிதாவின் கோட்டையாக நீடிக்க இரட்டை இலை சின்னத்துக்கு மக்கள் வாக்களிக்க வேண்டும்.

அதிமுக அரசுக்கு ஸ்ரீரங்கம் தொகுதி பக்கபலமாக இருக்கும் வகையில் அதிமுக வேட்பாளருக்கு இரட்டை இலை சின்னத்தில் மக்கள் வாக்களித்து வெற்றி பெறச் செய்ய வேண்டும்".

இவ்வாறு அவர் பேசினார்.

தொடர்ந்து, சோமரசம்பேட்டையில் மகளிர் சுய உதவிக் குழுவினர் கலந்து கொண்ட கூட்டத்தில் முதல்வர் பழனிசாமி பேசுகையில், "மகளிர் சுய உதவிக் குழுக்களுக்கு தேவையான அனைத்து உதவிகளையும் தமிழ்நாடு அரசு செய்து வருகிறது. பெண்கள் வாழ்வில் முன்னேற வேண்டும் என்று அரும்பாடுபட்டவர் மறைந்த முதல்வர் ஜெயலலிதா. மகளிருக்காக அவர் வழங்கிய திட்டங்களை அதிமுக அரசு தொடர்ந்து செயல்படுத்தி வருகிறது. கரோனோ காலத்திலும் சுய உதவிக் குழுக்களுக்கு பல்வேறு உதவிகளை அரசு செய்தது. மகளிருக்கு அதிக பாதுகாப்பை அரசு அளித்து வருகிறது. பெண்கள் நினைத்தால் எதையும் சாதிக்கலாம். தேர்தலின்போது நீங்கள் அதிமுகவுக்கு முழு ஒத்துழைப்பு அளிக்க வேண்டும்" என்றார்.

உலகின் மிகப்பெரிய தடுப்பூசி திட்டத்தை அடுத்த ஆண்டில் தொடங்க நாம் தயாராகி வருகிறோம் : பிரதமர் மோடி

குஜராத் மாநிலம் ராஜ்கோட்டில் எய்ம்ஸ் மருத்துவமனைக்குப் பிரதமர் நரேந்திர மோடி காணொலி வாயிலாக இன்று அடிக்கல் நாட்டினார். குஜராத் மாநிலத்தின் ஆளுநர், முதல்வர், மத்திய சுகாதார அமைச்சர், இணை அமைச்சர் ஆகியோர் இந்த நிகழ்ச்சியில் கலந்து கொண்டனர்.

இந்த மருத்துவமனைத் திட்டத்திற்காக 201 ஏக்கர் நிலம் ஒதுக்கப்பட்டுள்ளது. ரூ.1195 கோடி மதிப்பில் அமைக்கப்படவிருக்கும் இந்த மருத்துவமனையின் பணிகள் 2022-ஆம் ஆண்டு மத்தியில் நிறைவடையும் என்று எதிர்பார்க்கப்படுகிறது. 750 படுக்கைகளைக் கொண்ட இந்த நவீன மருத்துவமனையில் 30 படுக்கைகள் கொண்ட ஆயுஷ் கட்டிடமும் அமைக்கப்படும். இங்கு 125 எம்பிபிஎஸ் இடங்களும், செவிலியர் படிப்புக்கான 60 இடங்களும் இருக்கும்.

இந்த நிகழ்ச்சியில் பிரதமர் மோடி பேசியதாவது:

2020-ம் ஆண்டு பல்வேறு விஷயங்களை நமக்கு நன்றாகக் கற்றுக் கொடுத்தது. இது சவால்கள் நிறைந்த ஆண்டாகும். இந்தியாவின் முன்னணி கரோனா போர்வீரர்களை நினைவில் கொள்வதற்கு ஆண்டின் கடைசி நாள் இதுவாகும்.

நாட்டில் கரோனா நோய்த்தொற்று பாதிப்பு எண்ணிக்கை தற்போது குறைந்து வருகிறது. உலகின் மிகப்பெரிய தடுப்பூசி திட்டத்தை அடுத்த ஆண்டில் தொடங்க நாம் தயாராகி வருகிறோம். இந்தியாவில் தடுப்பூசிகள் தொடர்பாக தேவையான இறுதிகட்ட ஏற்பாடுகள் நடந்து வருகின்றன.

தடுப்பூசி நாட்டின் ஒவ்வொரு மூலையிலும் சென்றடைய முயற்சி மேற்கொள்ளப்பட்டு வருகிறது. நம்நாட்டில், வதந்திகள் விரைவாக பரவுகின்றன. வெவ்வேறு நபர்கள் தங்கள் தனிப்பட்ட லாபங்களுக்காக அல்லது பொறுப்பற்ற நடத்தை காரணமாக பல்வேறு வதந்திகளை பரப்பி வருகின்றனர். தடுப்பூசி போடத்தொடங்கும் போது வதந்திகள் பரவக்கூடும். எனவே மக்கள் கவனத்துடன் இருக்க வேண்டும். இவ்வாறு அவர் பேசினார்.

இந்தியாவில் உருமாறிய VUI-202012/01 கொரோனா பாதிக்கப்பட்டவர்கள் எண்ணிக்கை 25 ஆக அதிகரித்துள்ளது.

பிரிட்டனின் தெற்கு இங்கிலாந்து பகுதியில் VUI-202012/01 கொரோனா வைரஸில் புதிய வகை வைரஸ் வேகமாகப் பரவி வருவதையடுத்து பல்வேறு கட்டுப்பாடுகளை பிரிட்டன் அரசு விதித்துள்ளது.

பிரிட்டனில் பரவி வரும் புதிய வகை VUI-202012/01 கொரோனா வைரஸ் அச்சத்தால் பல்வேறு ஐரோப்பிய நாடுகளும் பிரிட்டனுக்கு விமானப் போக்குவரத்தை நிறுத்திவிட்டன. இந்தியாவும் டிசம்பர் 31-ம் தேதி வரை பிரிட்டனில் இருந்து இந்தியாவுக்கு விமானங்களை இயக்கத் தடை விதித்துள்ளது.

பிரிட்டனில் இருந்து தெலங்கானாவுக்கு சமீபத்தில் வந்த 279 பயணிகளைக் கண்டுபிடிக்க முடியவில்லை. இவர்களில் 184 பயணிகள் தவறான முகவரியை அளித்துள்ளது தெரியவந்துள்ளது.

மேலும், பிரிட்டனில் இருந்து ஆந்திரா, கர்நாடகா, கேரளா வழியாக தெலங்கானாவுக்கு வந்த 93 பயணிகள் முகவரியை ஆய்வு செய்தபோதிலும் அந்த முகவரியில் அவர்கள் கிடைக்கவில்லை. அவர்களின் தொலைபேசி எண்ணும் தவறாக இருந்தது.

இந்நிலையில் பிரிட்டனில் இருந்து வந்த பயணிகளுக்கு நடத்தப்பட்ட பரிசோதனையில் 21 பேருக்குக் VUI-202012/01 கொரோனா தொற்று இருப்பது உறுதி செய்யப்பட்டது. இவர்களின் மாதிரிகள் மரபணு பரிசோதனைக்கு அனுப்பி வைக்கப்பட்டது.

பெங்களூருவில் உள்ள ஆய்வகத்தில் நடத்தப்பட்ட சோதனையில் 3 பேருக்கு உருமாறிய VUI-202012/01 கொரோனா வைரஸ் பாதிப்பு இருப்பது உறுதி செய்யப்பட்டுள்ளது. ஹைதரபாத்தில் உள்ள செல்லியல் நுண் உயிரிழல் துறை ஆய்வகத்தில் நடந்த சோதனையிலும் 2 பேருக்கும் பிரிட்டனில் கண்டறியப்பட்ட உருமாறிய VUI-202012/01 கொரோனா வைரஸ் பாதிப்பு இருப்பது தெரியவந்தள்ளது.

புனேயில் உள்ள தேசிய வைராலஜி ஆய்வகத்தில் நடந்த சோதனையில் ஒருவருக்கு உருமாறிய VUI-202012/01 கொரோனா வைரஸ் பாதிப்பு இருப்பது கண்டுபிடிக்கப்பட்டுள்ளது. இதனையடுத்து அவர்கள் 6 பேரையும் தனிமை அறையில் வைத்து கண்காணிக்க மத்திய உள்துறை அமைச்சகம் உத்தரவிட்டது.

இதனைத் தொடர்ந்து நேற்று நிலவரப்படி தமிழகத்தைச் சேர்ந்த ஒருவர் உள்பட 20 பேருக்கு உருமாறிய VUI-202012/01 கொரோனா வைரஸ் தொற்று உறுதி செய்யப்பட்டிருந்தது. மற்றவர்களுடைய மாதிரிகளின் ஆய்வு முடிவுகளும் படிப்படியாக வெளியிடப்படுகின்றன.

இந்நிலையில் இன்று மேலும் 5 பேருக்கு உருமாறிய VUI-202012/01 கொரோனா வைரஸ் தொற்று உறுதி செய்யப்பட்டுள்ளது. இதன்மூலம் மொத்த பாதிப்பு 25 ஆக அதிகரித்துள்ளது. புதிய வகை வைரசால் பாதிக்கப்பட்டுள்ள 25 பேரும் மருத்துவமனைகளில் தனிமை வார்டில் அனுமதிக்கப்பட்டு, சிகிச்சை அளிக்கப்படுவதாக மத்திய சுகாதார அமைச்சகம் தெரிவித்துள்ளது.

தமிழக சட்டசபைக்கு முன்கூட்டியே தேர்தல் நடத்தப்படுவதற்கான வாய்ப்பு குறைவு : தேர்தல் கமிஷனர் சத்யபிரதா சாஹூ

தமிழக சட்டசபைக்கு முன்கூட்டியே தேர்தல் நடத்தப்படுவதற்கான வாய்ப்பு குறைவு என தமிழக தேர்தல் கமிஷனர் சத்யபிரதா சாஹூ தெரிவித்துள்ளார்.

இது தொடர்பாக அவர் கூறியதாவது: தமிழக சட்டசபை தேர்தலுக்கு முன்கூட்டியே வாய்ப்பு குறைவு. கூடுதல் ஓட்டுச்சாவடிகளை கண்டறியும் பணி நடந்து வருவதால் முன்கூட்டியே தேர்தல் நடத்த வாய்ப்பு இல்லை. ஒரு ஓட்டுச்சாவடியில் ஆயிரம் பேர் ஓட்டளிக்க ஏற்பாடு நடந்து வருகிறது. 67 ஆயிரமாக உள்ள ஓட்டுச்சாவடி எண்ணிக்கையை 95 ஆயிரமாக அதிகரிக்க திட்டம் உள்ளது.

இதனால், கூடுதல் மின்னணு ஓட்டுப்பதிவு இயந்திரங்கள் கொண்டு வரப்பட உள்ளன. மஹாராஷ்டிரா, ம.பி.,யில் இருந்து தமிழகத்திற்கு கூடுதல் இயந்திரங்கள் கொண்டு வரப்பட உள்ளது. இவ்வாறு அவர் கூறினார்.

பழனிசாமி அதிமுகவின் முதல்வர் வேட்பாளர் தானே தவிர, கூட்டணியின் முதல்வர் வேட்பாளர் அல்ல : பாமக உறுதி

தமிழக சட்டப்பேரவைக்கு அடுத்த ஆண்டு ஏப்ரல் அல்லது மே மாதத்தில் தேர்தல் நடைபெற உள்ளது. இந்நிலையில், அதிமுக கூட்டணியில் யார் முதல்வர் வேட்பாளர் என்ற பிரச்சனை பூதாகரமாக வெடித்தது. இதனையடுத்து, ஓ.பன்னீர்செல்வத்தை சமாதானப்படுத்தி ஒரு வழியாக முதல்வர் வேட்பாளராக எடப்பாடி பழனிசாமி அறிவிக்கப்பட்டார். 

ஆனால், தமிழக பாஜக தலைவர் எல்.முருகன் உள்ளிட்ட அக்கட்சியின் மற்ற தலைவர்களும் அதிமுக வேண்டுமென்றால், முதல்வர் வேட்பாளராக எடப்பாடி பழனிசாமியை அறிவிக்கலாம். எங்களால் அதை ஏற்றுக்கொள்ள முடியாது. தேசிய  ஜனநாயக கூட்டணியின் முதல்வர் வேட்பாளர் யார்? என்பதை டெல்லி பாஜக மேலிடம் தான் அறிவிக்கும் தொடர்ந்து கூறிவருகின்றனர். ஆனாலும், அதிமுக முதல்வர் வேட்பாளர் எடப்பாடி பழனிசாமி என்று அறிவித்தது தேர்தல் பிரச்சாரத்திலும் அக்கட்சி ஈடுபட்டு வருகின்றனர். அத்துடன், பாஜகவுடன் கூட்டணி தொடர்வதாகவும், எடப்பாடி பழனிசாமிமை முதல்வர் வேட்பாளராக ஏற்றுக் கொள்ளும் கட்சியுடன்தான் கூட்டணி என்றும் திட்டவட்டமாக தெரிவித்து வருகின்றனர்.

இந்நிலையில், பாமக தலைவரின் அதிரடியான கருத்து தமிழக அரசியலில் பரபரப்பை ஏற்படுத்துவதாக இருக்கின்றது. முதல்வர் வேட்பாளர் யார் என்பது குறித்து தேர்தல் நேரத்தில் ராமதாஸ் அறிவிப்பார் என ஜி.கே.மணி கூறியுள்ளார். அதிமுகவின் நிலைபாட்டிற்கும் கூட்டணி கட்சிகளுக்கும் தொடர்பு இல்லை. எடப்பாடி பழனிச்சாமி தான் முதல்வர் வேட்பாளர் என்பது அதிமுகவின் நிலைப்பாடு ஆகும் என்று பாமக தலைவர் ஜி.கே.மணி கூறியுள்ளது அதிமுகவிற்கு அதிர்ச்சியை ஏற்படுத்தியுள்ளது.

ரூ. 2 லட்சம் கோடி மதிப்பிலான 50 முக்கிய திட்டங்களை பிரதமர் அலுவலகம் கண்காணித்து வருகிறது

ரூ. 2 லட்சம் கோடி மதிப்பிலான 50 முக்கிய திட்டங்களை பிரதமர் அலுவலகம் கண்காணித்து வருகிறது. விரைவாக முடிக்க வேண்டிய இந்த திட்டங்களை கண்காணிக்க, செயலர்கள் மட்டத்திலான குழு ஒன்றை பிரதமர் அலுவலகம் அமைத்துள்ளது. இந்த திட்டங்களை தாமதப்படுத்துவதையும், நிறுத்தி வைக்கப்படுவதையும் தடுக்கவும் இந்த குழு நடவடிக்கை எடுக்கும்.

மும்பை - ஆமதாபாத் புல்லட் ரயில் திட்டம், சர் தம் இணைப்பு சாலை திட்டம், டில்லி- மீரட் எக்ஸ்பிரஸ்வே, புதுடில்லி ரயில் நிலையம் மறுசீரமைப்பு திட்டம், புனே மெட்ரோ ரயில் திட்டம், மும்பையில் உள்ள ஜவஹர்லால் நேரு துறைமுக திட்டம், நவி மும்பை சர்வதேச விமான நிலைய திட்டம் ஆகியவை அடங்கும். இதில், புதுடில்லி ரயில் திட்டம் தவிர்த்து மற்ற திட்டங்களுக்கு பிரதமர் மோடி அடிக்கல் நாட்டினார்.

இது தொடர்பாக பெயர் வெளியிட விரும்பாத அதிகாரிகள் கூறுகையில், இவை அனைத்தும், பெரிய திட்டங்களாக இருப்பதால், அவை தொடர்ச்சியாக கண்காணிக்கப்பட்டு வருகிறது. பிரதமர் மோடி தலைமையில் நடந்த ஆலோசனை கூட்டத்தில், சில திட்டங்கள் குறித்து ஆலோசனை நடத்தப்பட்டது. நிலம் கிடைக்காதது, சுற்றுச்சூழல் பிரச்னை காரணமாக சில திட்டங்களை நிறைவேற்றுவதில் காலதாமதம் ஏற்பட்டுள்ளது. இவ்வாறு அவர் கூறினார்.

முன்னதாக, இந்தியா சுதந்திரம் பெற்று 75 ஆண்டுகள் நிறைவு பெறும் 2022ம் ஆண்டிற்குள் முடிக்கப்பட வேண்டிய திட்டங்கள் குறித்த அறிக்கையை பல்வேறு அமைச்சகங்கள் மற்றும் துறைகளிடம் கேட்டிருந்தது. இதனை தொடர்ந்து மாற்றியமைக்கப்பட்ட கால அட்டவணைகளின்படி குறிப்பிட்ட காலத்திற்குள் முடிப்பதை உறுதி செய்ய வேண்டும் என உத்தரவிடப்பட்டுள்ளது.

இந்தியாவில் கடந்த 24 மணி நேரத்தில் புதிதாக 21,821 பேருக்குக் கொரோனா தொற்று உறுதி

இந்தியாவில் கடந்த 24 மணி நேரத்தில் புதிதாக 21,821 பேருக்குக் கொரோனா தொற்று ஏற்பட்டுள்ளது. இதன் மூலம் ஒட்டுமொத்த பாதிப்பு 1,02,66,674 ஆக அதிகரித்துள்ளது.

கொரோனாவிலிருந்து குணமடைந்து வீடு திரும்பியோர் எண்ணிக்கை 98,60,280 ஆக உயர்ந்துள்ளது. கடந்த 24 மணிநேரத்தில் மட்டும் 26,139 பேர் கொரோனாவில் இருந்து குணமடைந்துள்ளனர்.

கொரோனா பாதிப்பால் தற்போது சிகிச்சை பெறுவோர் எண்ணிக்கை 2,57,656 ஆகக் குறைந்துள்ளது.

கொரோனா வைரஸால் நேற்று மட்டும் 299 பேர் உயிரிழந்தனர். ஒட்டுமொத்த உயிரிழப்பு 1,48,738 ஆக அதிகரித்துள்ளது.

தி.மு.க.வில் கனிமொழிக்கு செக்... ! கனிமொழி வருங்காலத்தில் கட்சியைப் பிடித்து விடுவாரோ..?

தி.மு.க.வில் கனிமொழிக்கு செக் வைக்கப்பட்டுள்ளதாக அமைச்சர் டி.ஜெயக்குமார் தெரிவித்தார். இது குறித்து பேசிய அவர், நடிகர் ரஜினிகாந்த் தன்னுடைய உடல்நிலையைக் கூறி அரசியலுக்கு வருவதைத் தவிர்த்து உள்ளார். அவர் அரசியலுக்கு வந்தாலும் வராமல் சென்றாலும் கழகத்திற்கு எந்த ஒரு பாதிப்பும் இல்லை.

ரஜினி ரசிகர் மட்டும் இல்லாமல் தமிழகத்தில் உள்ள மக்கள் அனைவரும் எங்களுக்கு வாக்களிப்பார்கள்.திமுக தலைவர் ஸ்டாலின் அவருடைய கட்சியில் உள்ள பிரச்சினைகளை மறைக்கக் கழகத்தில் பிரச்சினை உள்ளதாகக் கூறிவருகிறார்.

 

திமுகவில் சீனியர்களுக்கு என்ன மரியாதை உள்ளது? பாட்டன், முப்பாட்டன், பேரன், கொள்ளு பேரன், எள்ளுப் பேரன் ஆகியோர் தான் கட்சித் தலைவராக முடியும். ஆனால் எங்கள் கட்சியில் கொடி பிடிக்கும் சாதாரண தொண்டன் உயர்ந்த பதவிக்கு ஏன் முதலமைச்சராகக் கூட வர முடியும். முதலமைச்சரும் அப்படித்தான். முதலமைச்சர் யார். சாதாரண விவசாயி. நான் யார்? டாட்டா பிர்லா பரம்பரையா? காசிமேட்டில் பிறந்தவன்.

புரட்சித்தலைவர், புரட்சித் தலைவியின் விசுவாசியாகி கொடிபிடித்து வளர்ந்தவன். அந்த கழக கொடி பிடித்த காரணத்தினால் இன்று தேசியக் கொடியுடன் வலம் வர முடிகிறது. கொடி கட்டும் நபருக்கு தான் கழகத்தில் மரியாதை. திமுகவில் வாரிசுகளுக்கு தான் மரியாதை. உதயநிதிக்கு முக்கியத்துவம் அளிக்கிறார்கள்.

 

தற்போது திமுக தலைவர், அவரின் தந்தை படம், பெரியார், அண்ணா படத்தைப் போடுங்கள் என்று தெரிவித்துள்ளார். இது எல்லோருக்கும் தானே பொருந்தும். அதில் உதயநிதி படத்தைப் போடலாமா. அவருக்கு மட்டும் ஏன் விதிவிலக்கு. இது யாருக்கு வைக்கும் செக். துரைமுருகன், பொன்முடி, கனிமொழி ஆகியோரின் படத்தைப் போடக்கூடாது என்றால் இது முழுக்க முழுக்க கனிமொழிக்கு வைத்த செக் தான்.

கனிமொழி வருங்காலத்தில் கட்சியைப் பிடித்து விடுவாரோ என்று இன்றைக்கே மட்டம் தட்டும் பணிகள் அந்த குடும்பத்தில் நடைபெற்று வருகிறது என்று கூறியுள்ளார்.

'நில அபகரிப்பு' ஊழல் திமுக... இன்று "வீடுகள் இங்கே! பட்டா எங்கே" 'ஊழல் நாடக வீட்டுமனை பட்டா' போராட்டம்

நிலத்தை அனைவரிடமும் ஊழல் தி.மு.க நிர்வாகிகள் பிடுங்கி தங்கள் பெயரில் மாற்றி தங்களது ஆட்சிக்காலத்தில் அராஜகம் செய்து வந்ததால் பின்பு அ.தி.மு.க ஆட்சிக்காலத்தில் மறைந்த முதல்வர் ஜெ.ஜெயலலிதா அவர்களால் துவக்கி வைக்கப்பட்ட சட்டமே 'நில அபகரிப்பு' சட்டமாகும். ஒரு கட்சியின் அட்டூழியம் காரணமாகவே ஒரு சட்டம் இயற்றப்பட்டது என்றால் அது தி.மு.க'வின் அராஜக போக்கிற்கை அடக்குவதற்காக உருவாக்கப்பட்ட 'நில அபகரிப்பு' சட்டமாகும்.

இப்படிப்பட்ட வரலாறு உடைய தி.மு.க கடந்த இரண்டு நாட்களாக ஒரு போராட்டத்தை முன்னெடுத்து வருகிறது. அது ஆட்சேபனையற்ற நிலங்களில் வசிப்பவர்களுக்கு இலவச வீட்டு மனைப்பட்டா வழங்க வேண்டும் என தமிழக அரசுக்கு வலியுறுத்திய போராட்டம் தான் அது.

தி.மு.க தலைவர் ஸ்டாலின் அறிக்கையின் படி தி.மு.க உடன்பிறப்புகள் "வீடுகள் இங்கே! பட்டா எங்கே" என்ற முழக்கத்துடன் போராட்டத்தில் ஈடுபட்டனர். குறிப்பாக சென்னை புறநகர் பகுதியான சோழிங்க நல்லூர் தோகுதி, விருகம்பாக்கம் தொகுதி ஆகிய இடங்களில் தி.மு.க மாவட்டட செயலாளர் மற்றும் எம்.எல்.ஏ'க்கள் "வீடுகள் இங்கே! பட்டா எங்கே" என போராட்டத்தில் ஈடுபட்டனர்.

தமிழகத்தில் பயன்படாத நிலங்களில் குடியிருப்போருக்கு எப்படியும் 10 ஆண்டுகளுக்கு மேல் குடியிருப்பவர்களுக்கு மாவட்ட ஆட்சியர் குறை தீர்ப்பு முகாம்'கள் மூலமும். அல்லது சிறப்பு ஏற்பாட்டிலும் பட்டா வழங்கப்படுவது நடைமுறையில் உள்ளது.

மாறாக கோவில் நிலம், மற்றும் நீர்ப்பிடிப்பு பகுதிகளான ஏரி, குளம், ஆற்றுப்படுகை பகுதிகளில் வசிப்பவர்களுக்கு மட்டுமே சுலபத்தில் பட்டா வழங்கப்படமாட்டாது. இப்படி இருப்பது ஐந்து முறை ஆட்சிக்கு வந்த தி.மு.க'வினருக்கு தெரியும். இருப்பினும் மக்களை ஏதாவது சொல்லை குழப்பி, மடைமாற்றி ஆட்சிக்கு வர துடிப்பது தி.மு.க'வின் செய்கைகளில் இருந்து தெரிகிறது என அரசியல் விமர்சகர்கள் கூறுகின்றனர்.

 

அப்படி மக்கள் வசிக்கும் பகுதிக்கு பட்டா கேட்டு போராடும் அளவிற்கு தி.மு.க'விற்கு கரிசனம் இருந்தார் ஏன் 'நில அபகரிப்பு' சட்டமே இயற்றும் அளவிற்கு மக்களிடம் நிலத்தை பிடுங்கினார்கள் என்ற கேள்வியும் எழுந்துள்ளது. தி.மு.க'வின் அதிகாரப்பூர்வ பத்திரிக்கையான 'முரசொலி' அலுவலகம் அமைந்திருக்கும்

இடத்தின் மூலப்பத்திரத்தையே காட்டாதவர்கள் மக்களுக்காக நீலிக்கண்ணீர் வடித்து பட்டா கேட்பது நகைப்புக்குரியது என மக்களே கருதுகின்றனர்.

இந்தியாவின் கீழ் கலங்கரை விளக்கத் திட்டம் நாளை அடிக்கல் நாட்டுகிறார் பிரதமர் மோடி

ஆறு மாநிலங்களில் உள்ள ஆறு நகரங்களில் சர்வதேச வீட்டுவசதித் தொழில்நுட்ப சவால் - இந்தியா திட்டத்தின் கீழ் கலங்கரை விளக்கத் திட்டங்களுக்கான அடிக்கல்லை காணொலி மூலம் 2021 ஜனவரி 1 அன்று காலை 11 மணிக்கு பிரதமர் நரேந்திர மோடி நாட்டுகிறார்.

குறைந்த விலையிலான நீடித்த வீட்டு வசதிக்கான ஆஷா இந்தியா திட்டத்தின் வெற்றியாளர்களையும் அறிவிக்க இருக்கும் பிரதமர், பிரதமர் வீட்டு வசதித் திட்டத்தை (நகர்புறம்) சிறப்பாகச் செயல் செயல்படுத்தியதற்கான வருடாந்திர விருதுகளையும் வழங்குகிறார்.

இந்த நிகழ்ச்சியின் போது, நவரித் (இந்திய வீட்டுவசதிக்கான புதிய, கட்டுப்படியாகக் கூடிய, சரிபார்க்கப்பட்ட, புதுமை ஆராய்ச்சித் தொழில்நுட்பங்கள்) என்னும் புதுமையான கட்டுமான தொழில்நுட்பங்களுக்கான சான்றிதழ் கல்வியையும் பிரதமர் அறிமுகப்படுத்தி வைக்கிறார். மேலும், சர்வதேச வீட்டுவசதி தொழில்நுட்பச் சவால் - இந்தியாவால் அடையாளம் காணப்பட்டுள்ள 54 புதுமையான வீட்டுவசதிக் கட்டுமானத் தொழில்நுட்பங்கள் குறித்த கையேட்டையும் அவர் வெளியிடுகிறார். திரிபுரா, ஜார்க்கண்ட், உத்தரப் பிரதேசம், மத்தியப்பிரதேசம், குஜராத், தமிழ்நாடு மற்றும் ஆந்திரப் பிரதேசத்தின் முதல்வர்கள் இந்நிகழ்ச்சியில் பபங்கேற்கிறார்கள்.

கலங்கரை விளக்கத் திட்டங்கள்

நாட்டிலேயே முதல்முறையாக, கட்டுமானத் தொழிலில் புதுயுக மாற்று சர்வதேசத் தொழில்நுட்பங்கள், பொருள்கள் மற்றும் நடவடிக்கைகளை கலங்கரை விளக்கம் திட்டங்கள் மிகப்பெரிய அளவில் எடுத்துக் காட்டுகின்றன. வீட்டுவசதிக் கட்டுமானத்துறையில் முழுமையான வகையில் புதுமைத் தொழில்நுட்பங்களை ஏற்றுக் கொள்வதற்கான சூழ்நிலைகளை உருவாக்குவதற்கு பணியாற்றிக் கொண்டிருக்கும் சர்வதேச வீட்டுவசதித் தொழில்நுட்பச் சவால் - இந்தியாவின் கீழ் இவை கட்டமைக்கப்பட்டு வருகின்றன. மத்தியப்பிரதேசத்தில் உள்ள இந்தூர், குஜராத்தில் உள்ள ராஜ்கோட், தமிழ்நாட்டில் சென்னை, ஜார்க்கண்டில் உள்ள ராஞ்சி, திரிபுராவில் உள்ள அகர்தலா மற்றும் உத்தரப்பிரதேசத்தில் உள்ள லக்னோ ஆகிய நகரங்களில் கலங்கரை விளக்கத் திட்டங்கள் கட்டமைக்கப்பட்டு வருகின்றன.

ஒவ்வொரு இடத்திலும் உள்கட்டமைப்பு வசதிகளுடன் கூடிய ஆயிரம் வீடுகள் கட்டப்பட்டு வருகின்றன. வாழ்வதற்குத் தயாரான வீடுகளை 12 மாதங்களுக்குள் வழங்குவதே இந்தத் திட்டத்தின் நோக்கமாகும். காலங்காலமாக கடைபிடிக்கப்பட்டு வரும் கட்டுமானத்துடன் ஒப்பிடும் போது இவற்றின் செலவு குறைவாகவும், அதேசமயம் இந்த வீடுகள் அதிக தரத்துடனும் நீடித்து நிற்கும் வகையிலும் இருக்கும்.

இந்தூரில் முன்கூட்டியே கட்டமைக்கப்பட்ட அமைப்பு, ராஜ்கோட்டில் ஒற்றைக்கல் கட்டுமானத் தொழில்நுட்பம், சென்னையில் முன்வார்ப்பு கான்கிரீட் கட்டுமான அமைப்பு, ராஞ்சியில் முப்பரிமாண முன்வார்ப்புக் கட்டுமான அமைப்பு, அகர்தலாவில் எஃகுக் கட்டமைப்பு கொண்ட இலகு பலகம், லக்னோவில் பிவிசி அமைப்பு போன்ற பல்வேறு தொழில்நுட்பங்களை கலங்கரை விளக்கத்திட்டங்கள் பயன்படுத்துகின்றன. இத்துறையில் தொழில்நுட்பப் பகிர்தல் மற்றும் அதன் மறுபயன்பாட்டுக்கு நேரடி ஆய்வகங்களாக கலங்கரை விளக்கத் திட்டங்கள் திகழும். ஐஐடிக்கள், என்ஐடிக்கள், இதர பொறியியல் கல்லூரிகள், திட்டமிடுதல் மற்றும் கட்டுமானக் கல்லூரிகள் ஆகியவற்றின் ஆசிரியர்கள் மற்றும் மாணவர்கள், கட்டுமானர்கள், தனியார் மற்றும் பொதுத்துறைப் பணியாளர்கள் மற்றும் இதர பங்குதாரர்களுக்கு திட்டமிடுதல், வடிவமைப்பு, பொருள்களின் உற்பத்தி, கட்டுமான நடவடிக்கைகள் மற்றும் பரிசோதனை ஆகியவற்றை இது உள்ளடக்கும்.

ஆஷா-இந்தியா

குறைந்த விலையிலான நீடித்த வீட்டுவசதியை மேம்படுத்துவதற்கான ஆஷா இந்தியா திட்டம், சாத்தியமுள்ள எதிர்காலத் தொழில்நுட்பங்களுக்கு வழிகாட்டுதலையும், மேம்பாட்டு ஆதரவையும் அளித்து உள்நாட்டு ஆராய்ச்சி மற்றும் தொழில்முனைதலை ஊக்குவிப்பதை நோக்கமாகக் கொண்டது. ஆஷா-இந்தியா திட்டத்தின் கீழ், வழிகாட்டுதலையும், மேம்பாட்டு ஆதரவையும் அளிப்பதற்காக ஐந்து ஆஷா-இந்தியா மையங்கள் அமைக்கப்பட்டுள்ளன. மேம்பாட்டு ஆதரவின் கீழ் சாத்தியமுள்ள தொழில்நுட்பத்திற்கான வெற்றியாளர்களை பிரதமர் அறிவிப்பார். இந்த முன்னெடுப்பின் கீழ் அடையாளப்படுத்தப்பட்டுள்ள தொழில்நுட்பங்கள், செயல்முறைகள் மற்றும் பொருட்கள் இளம் மற்றும் படைப்புத்திறன் மிக்க மனங்கள், புது நிறுவனங்கள், புதுமையாளர்கள் மற்றும் தொழில்முனைவோருக்கு மிகப்பெரிய ஊக்கத்தை அளிக்கும்.

பிரதமர் வீட்டு வசதி திட்டம் - நகர்புறம் இயக்கம்

2022-க்குள் அனைவருக்கும் வீட்டுவசதி என்னும் இலக்கை எட்டுவதற்காக பிரதமர் வீட்டு வசதித் திட்டம் - நகர்புறம் உருவாக்கப்பட்டது. மாநிலங்கள், யூனியன் பிரதேசங்கள், நகர்ப்புற உள்ளாட்சி அமைப்புகள் மற்றும் பயனாளிகளின் சிறப்பான பங்களிப்பை அங்கீகரிப்பதற்காக, பிரதமர் வீட்டு வசதித் திட்டம் - நகர்புறம் திட்டத்தை சிறப்பாகச் செயல்படுத்துவதற்கான வருடாந்திர விருதுகளை மத்திய வீட்டுவசதி மற்றும் நகர்ப்புற விவகாரங்கள் அமைச்சகம் அறிவித்தது. பிரதமர் வீட்டு வசதித் திட்டம் - நகர்புறம் திட்ட விருதுகள் - 2019-இன் வெற்றியாளர்கள் நிகழ்ச்சியின் போது கௌரவிக்கப்படுவார்கள்.

4 மாநிலங்களில் காலா அசார் - கருங்காய்ச்சல் பாதிப்பு : அமைச்சர் ஹர்ஷ் வர்தன் ஆய்வு

நான்கு மாநிலங்களில் காலா அசார் - கருங்காய்ச்சல் நிலவரம் குறித்து மத்திய சுகாதாரம் மற்றும் குடும்ப நல அமைச்சர் ஹர்ஷ் வர்தன் ஆய்வு மேற்கொண்டார்.

பிகார் சுகாதார அமைச்சர் மங்கல் பாண்டே, மேற்கு வங்க சுகாதாரம் மற்றும் குடும்ப நல இணை அமைச்சர் சந்திரிமா பட்டாச்சார்யா, உத்தரப்பிரதேச மருத்துவம், சுகாதாரம், குடும்ப நலம் மற்றும் தாய் சேய் நல அமைச்சர். ஜெய் பிரதாப் சிங், ஜார்கண்ட் சுகாதாரம், மருத்துவக் கல்வி மற்றும் குடும்ப நல அமைச்சர். பன்னா குப்தா ஆகியோர் இந்த ஆய்வுக் கூட்டத்தில் கலந்து கொண்டனர்.

கூட்டத்தில் பேசிய டாக்டர். ஹர்ஷ் வர்தன், கருங்காய்ச்சலை ஒழிக்க இந்திய அரசு உறுதி பூண்டுள்ளதாகக் கூறினார். 'மலேரியாவுக்குப் பிறகு உலகிலேயே இரண்டாவது பெரிய ஆட்கொல்லி நோய் கருங் காய்ச்சல் ஆகும். முறையான சிகிச்சை அளிக்கப்படாவிடில், 95 சதவீதம் பேர் இந்த நோயினால் உயிரிழக்கின்றனர்,' என்று அவர் கூறினார்.

முறையாக சிகிச்சை அளிக்கப்பட்டவர்களில் 20 சதவீதம் பேருக்கு சிகிச்சைக்கு சில மாதங்களுக்குப் பிறகு ஒரு வகையான தோல் நோய் ஏற்படுவதாக மத்திய சுகாதாரம் மற்றும் குடும்ப நல அமைச்சர் கூறினார்.

உத்தரப்பிரதேசம், பிஹார், ஜார்கண்ட் மற்றும் மேற்கு வங்கம் ஆகிய நான்கு மாநிலங்களில் உள்ள 54 மாவட்டங்களில் கருங்காய்ச்சல் பாதிப்புகள் இருப்பதாக அமைச்சருக்கு எடுத்துரைக்கப்பட்டது.

மேலும், அசாம், ஹிமாச்சலப்பிரதேசம், ஜம்மு காஷ்மீர், கேரளா, சிக்கிம் மற்றும் உத்தரகாண்ட் ஆகிய மாநிலங்களிலும் குறைந்த அளவில் பாதிப்புகள் இருப்பதாக அமைச்சருக்கு எடுத்துரைக்கப்பட்டது.

நம்ம சென்னை' செல்ஃபி மையம் விரைவில்...

மாநகராட்சி சார்பில் இளைஞர்களை கவரும் வகையில் மெரினா கடற்கரையில் அமைக்கப்பட்டு வரும் 'நம்ம சென்னை' செல்ஃபி மையம் விரைவில் திறக்கப்பட உள்ளது.

சென்னையில் உள்ளூர் மக்களும், சுற்றுலாப் பயணிகளும் அதிக அளவில் வந்து செல்லும்பகுதியாக மெரினா கடற்கரை உள்ளது. இந்த கடற்கரை அதிகஅளவில் இளம் தலைமுறையினரை கவர்ந்து வருகிறது.இன்றைய இளைய தலைமுறையினர், ஸ்மார்ட் கைபேசிகளை பயன்படுத்துவதிலும், அதில் செல்ஃபி எடுப்பதிலும் அதிக ஆர்வம் காட்டி வருகின்றனர். இவர்களின் ஆர்வத்தை பூர்த்தி செய்யும் வகையில், சென்னை மாநகராட்சி சார்பில், சென்னையின் அடையாளமாக, இளைஞர்களை கவரும் விதமாக ஓர் இடத்தை உருவாக்க திட்டமிடப்பட்டது.

அதன் அடிப்படையில் ரூ.20லட்சம் செலவில் மெரினா கடற்கரையில், ராணி மேரி கல்லூரிக்கு எதிரில் 'நம்ம சென்னை' செல்ஃபிமையத்தை அமைக்கும் பணிகள் கடந்த இரு மாதங்களாக நடைபெற்று வருகின்றன. தற்போது பணிகள் இறுதிகட்டத்தை எட்டியுள்ளன.

இது தொடர்பாக சென்னை மாநகராட்சி அதிகாரிகள் கூறும்போது, 'இந்த செல்ஃபி மையம் நிச்சயம் இளைஞர்கள் மற்றும் குழந்தைகள் மத்தியில் பெரும் வரவேற்பைப் பெறும். இந்த இடம் சென்னையின் அடையாளமாகவும் மாற வாய்ப்புள்ளது. அனைத்து பணிகளும் விரைவில் முடிய உள்ளன. இந்த செல்ஃபி மையத்தை பொங்கல் திருவிழாவின்போது, முதல்வர் திறந்து வைக்க திட்டமிடப்பட்டுள்ளது' என்றனர்.

ஏற்கெனவே கோவை மற்றும் ஆவடி மாநகராட்சி பகுதிகளில், 'ஐ லவ் கோவை', 'ஐ லவ் ஆவடி' என செல்ஃபி மையங்கள் அமைக்கப்பட்டுள்ளன. அதனைத் தொடர்ந்து தற்போது சென்னையில் இந்த செல்ஃபி மையம் விரைவில் திறக்கப்பட உள்ளது.

டிஜிட்டல் ஆளுமையில் சிறந்த மாநிலம் தமிழகம் - தங்க விருது : ராம்நாத் கோவிந்த் காணொலியில் நேற்று வழங்கினார்.

'டிஜிட்டல் ஆளுமையில் சிறந்த மாநிலம்' என்ற பிரிவில் 'டிஜிட்டல் இந்தியா- 2020 தங்க விருதை' இந்த ஆண்டு தமிழகம் பெற்றுள்ளது.

இதுகுறித்து தமிழக அரசு வெளியிட்ட செய்திக்குறிப்பில் கூறியிருப்பதாவது:

புதுமையான டிஜிட்டல் தீர்வுகளை முன்னிறுத்தி அவற்றை அனைத்து அரசு நிறுவனங்களும் பின்பற்றுவதை ஊக்குவிப்பதை நோக்கமாகக் கொண்டு, டிஜிட்டல்இந்தியா விருதுகள் இந்திய தேசியஇணையத்தில் நிறுவப்பட்டுள்ளன.

சுகாதாரம், தொழிலாளர், நிதி, சமூக நீதி மற்றும் சுற்றுச்சூழல் போன்ற துறைகளில் நீடித்த வளர்ச்சி இலக்குகளை அடையும்பொருட்டு, விரிவான டிஜிட்டல் தொழில்நுட்பங்களை உபயோகிப்பதில் முன்னோடி முயற்சிகளைகொண்டுள்ள மாநிலம் மற்றும்யூனியன் பிரதேசங்களுக்கு இவ்விருதுகள் வழங்கப்படுகின்றன.

நம்பிக்கை இணையம், இயந்திர கற்றல், செயற்கை நுண்ணறிவு, பல்பொருள் இணையம், இயற்கை மொழி செயலாக்கம், குரல் பயனர்இடைமுகம், பெரிய தரவு மற்றும்பகுப்பாய்வு, மெய்நிகர் உண்மை போன்ற வளர்ந்துவரும் தொழில்நுட்பங்களும் மதிப்பீடு செய்யப்படுகின்றன.

இந்நிலையில், 'டிஜிட்டல் ஆளுமையில் சிறந்த மாநிலம்' என்ற பிரிவில் 'டிஜிட்டல் இந்தியா- 2020 தங்க விருதை' இந்த ஆண்டு தமிழகம் பெற்றுள்ளது. இந்த விருதை நேற்று நடைபெற்ற டிஜிட்டல் இந்தியா-2020 விருதுகள் வழங்குவதற்கான மெய்நிகர் விழாவில் குடியரசுத் தலைவர் ராம்நாத் கோவிந்த் வழங்கினார்.

இவ்விழாவில், மத்திய தகவல் தொழில்நுட்ப அமைச்சர் ரவிசங்கர் பிரசாத், தகவல் தொழில்நுட்பத் துறை செயலர் அஜய் பிரகாஷ் ஷானே, தேசிய தகவலியல் மையதலைமை இயக்குநர் நீட்டா வர்மா,தமிழக தகவல் தொழில்நுட்பத் துறை செயலர் ஹன்ஸ்ராஜ் வர்மா, தமிழ்நாடு தேசிய தகவலியல் மைய தொழில்நுட்ப இயக்குநர்கள் எம்.பாலசுப்பிரமணியன், ஜே.அருண்குமார், டி.ஈஸ்வரன் உள்ளிட்டோர் பங்கேற்றனர். இவ்வாறு அதில் கூறப்பட்டுள்ளது.

விவசாய சங்கங்கள் முன்வைத்த 2 கோரிக் கைகளையும் மத்திய அரசு ஏற்றுக் கொண்டுள்ளது என்ன கோரிக்கை..?

புதிய வேளாண் சட்டங்களை நீக்க முடியாது என்றும், இந்த சட்டங்களை ஆராய்வதற்கு குழு அமைக்கப்படும் எனவும் விவசாய அமைப்புகளின் பிரதிநிதிகளிடம் மத்திய அரசு உறுதி அளித்தது.

மத்திய அரசு நிறைவேற்றியுள்ள 3 புதிய வேளாண் சட்டங்களை திரும்பப் பெற வலியுறுத்தி பஞ்சாப், ஹரியாணா உள்ளிட்ட மாநிலங் களைச் சேர்ந்த ஆயிரக்கணக்கான விவசாயிகள் டெல்லியின் எல் லைப் பகுதிகளில் முகாமிட்டு கடந்த ஒரு மாதத்துக்கும் மேலாக தொடர் போராட்டத்தில் ஈடுபட்டு வருகின்றனர். போராட்டத்தை முடிவுக்கு கொண்டு வருவதற்காக மத்திய அரசு 5 கட்டங்களாக பேச்சுவார்த்தை நடத்தியது. அப்போது, வேளாண் சட்டங்களில் திருத்தம் மேற்கொள்வதற்கும், குறைந்தபட்ச ஆதரவு விலை தொடரும் என்பதற்கு எழுத்துப் பூர்வமாக வாக்குறுதி அளிப்பதற் கும் தயாராக இருப்பதாக மத்திய அரசு தரப்பில் தெரிவிக்கப்பட்டது.

எனினும், வேளாண் சட்டங்களை ரத்து செய்ய வேண்டும் என்ற நிலைப்பாட்டில் விவசாய சங்கங் கள் உறுதியாக இருந்ததால், இந்த பேச்சுவார்த்தைகளில் சுமுக முடிவு ஏதும் எட்டப்படவில்லை.

இதையடுத்து, விவசாயிகள் தங் கள் போராட்டத்தை தீவிரப்படுத்தும் நடவடிக்கையில் இறங்கினர். உண்ணாவிரதம், நாடு தழுவிய வேலைநிறுத்தம், சுங்கச்சாவடிகள் முற்றுகை என போராட்டத்தை அவர்கள் தீவிரப்படுத்தினர்.

இதையடுத்து, விவசாயிகளை 6-வது கட்ட பேச்சுவார்த்தைக்கு மத்திய அரசு அழைத்தது. வேளாண் சட்டங்களை ரத்து செய்வதைத் தவிர வேறு எந்த சமரசத்தையும் ஏற்க மாட்டோம் என தெரிவித்த விவ சாய சங்கங்கள், மத்திய அரசின் அழைப்பை நிராகரித்து வந்தன.

இதனிடையே, கடந்த 25-ம் தேதி 'பி.எம்.கிசான்' திட்டத்தின்கீழ் 9 கோடி விவசாயிகளுக்கு 18 ஆயிரம் கோடியை பிரதமர் நரேந்திர மோடி விடுவித்தார். அப்போது காணொலி மூலம் விவசாயிகளிடையே பேசிய பிரதமர், மத்திய அரசு திறந்த மனதுடன் பேசுவதற்கு தயாராக இருப்பதாக தெரிவித்தார்.

பிரதமரின் வேண்டுகோளை ஏற்று 6-வது கட்ட பேச்சுவார்த்தைக்கு விவசாயிகள் சம்மதித்தனர்.

அதன்படி, டெல்லி விஞ்ஞான் பவனில் நேற்று மதியம் 2 மணிக்கு பேச்சுவார்த்தை தொடங்கியது. மத்திய வேளாண் துறை அமைச்சர் நரேந்திர சிங் தோமர், ரயில்வே அமைச்சர் பியூஷ் கோயல், வர்த் தக அமைச்சர் சோம் பர்காஷ் ஆகி யோர் தலைமையில் நடந்த இந்த பேச்சுவார்த்தையில் 41 விவசாய சங்கங்களின் பிரதிநிதிகள் கலந்து கொண்டனர்.

பேச்சுவார்த்தை தொடங்கிய தும், புதிய வேளாண் சட்ட விவ காரம் குறித்து கடைசியாக விவா திக்கலாம் என்றும், வேறு கோரிக் கைகளை முதலில் விவசாயிகள் தெரிவிக்கலாம் என்றும் மத்திய அமைச்சர்கள் தெரிவித்தனர்.

இதை ஏற்றுக்கொண்ட விவசாய சங்க பிரதிநிதிகள், வேளாண் கழிவு களை எரிக்கும் விவசாயிகளுக்கு அபராதம் விதிக்கும் 'தேசிய தலை நகர் காற்று தர மேலாண்மைக்கான அவசரச் சட்டம்', 'விவசாயிகளிடம் இருந்து மின் கட்டணத்தை வசூலிக்க வகை செய்யும் மின்சார அவ சரச் சட்டம்' ஆகிய இரண்டையும் ரத்து செய்ய வேண்டும் என கோரிக்கை விடுத்தனர். இதுதொடர் பாக ஒரு மணி நேரத்துக்கும் மேலாக விவாதம் நடந்தது. பின்னர், இந்த இரண்டு கோரிக்கைகளையும் ஏற்றுக் கொள்வதாக மத்திய அமைச்சர்கள் தெரிவித்தனர்.

இதைத் தொடர்ந்து, புதிய வேளாண் சட்டங்கள் குறித்த விவா தம் தொடங்கியது. அப்போது, விவசாயிகளிடம் பேசிய வேளாண் துறை மூத்த அதிகாரிகள், ''இந்த சட்டங்களை நீக்குவது அவ்வளவு எளிதான காரியம் அல்ல'' என தெரிவித்தனர். அதுமட்டுமின்றி, இந்த சட்டங்களால் விவசாயி களுக்கு கிடைக்கும் பலன்களையும் எடுத்துரைத்தனர்.

ஆனால், இதை ஏற்க மறுத்த விவசாயிகள், மூன்று வேளாண் சட்டங்களையும் ரத்து செய்ய வேண் டும் என தொடர்ந்து வலியுறுத்தினர். சுமார் 5 மணி நேரத்துக்கும்மேல் இந்த விவகாரம் தொடர்பாக மத்திய அமைச்சர்களும், விவசாய சங்கப் பிரதிநிதிகளும் பேச்சுவார்த்தை நடத்தினர். முடிவில், வேளாண் சட்டங்களை ரத்து செய்ய முடியாதுஎன மத்திய அரசு தரப்பில் திட்டவட்டமாக தெரிவிக்கப்பட்டது. வேண்டுமெனில், இந்த சட்டங்கள் குறித்து விரிவாக ஆய்வு செய்ய அனைத்து தரப்பினரையும் உள் ளடக்கிய குழு அமைக்கப்படும் எனவும் அமைச்சர்கள் தெரிவித்தனர்.

மத்திய அரசின் இந்த முடிவை ஏற்க முடியாது என விவசாய சங்கப் பிரதிநிதிகள் திட்டவட்டமாக கூறியதாக பேச்சுவார்த்தையில் பங்கேற்ற அதிகாரிகள் தெரிவித்தனர்.

இதையடுத்து, வரும் 4-ம் தேதி மீண்டும் பேச்சுவார்த்தைக்கு வருமாறு மத்திய அமைச்சர்கள் அழைப்பு விடுத்தனர். இதற்கு விவசாய சங்க பிரதிநிதிகளும் சம்மதம் தெரிவித்துள்ளனர்.

பேச்சுவார்த்தைக்கு பின்னர் செய்தியாளர்களிடம் மத்திய அமைச்சர் நரேந்திர சிங் தோமர் கூறியதாவது:

விவசாய சங்கப் பிரதிநிதிகளு டன் நடந்த 6-வது கட்ட பேச்சு வார்த்தை மிகவும் ஆக்கப்பூர்வ மாகவும், சுமுகமாகவும் இருந்தது. விவசாயிகள் முன்வைத்த 4 கோரிக்கைகளில் 2 கோரிக்கைகள் ஏற்கப்பட்டுள்ளன. மீதமுள்ள கோரிக்கைகள் தொடர்பாக வரும் 4-ம் தேதி மீண்டும் பேச்சுவார்த்தை நடத்தப்படும். இதில் சுமுகமான நல்ல முடிவு எட்டப்படும் என்ற நம் பிக்கை உள்ளது. விவசாயிகளின் நலன்களுக்காகவே மத்திய அரசு உழைத்து வருகிறது என்பதை விவசாய சங்க பிரதிநிதிகளிடம் விளக்கினோம். அவர்களும் அதை ஏற்றுக் கொண்டிருக்கின்றனர். இவ்வாறு நரேந்திர சிங் தோமர் கூறினார்.