தமிழகத்தில் பாஜ கட்சியை வலுப்படுத்த அண்ணாமலை முக்கியப் பங்காற்றியுள்ளார்... பிரதமர் மோடி

 தமிழகத்தில் பாரதிய ஜனதா கட்சியை வலுப்படுத்த அண்ணாமலை முக்கியப் பங்காற்றியுள்ளார் என்று பிரதமர் மோடி பாராட்டினார்.

நாடு முழுவதும் நாடாளுமன்றத் தேர்தல் வரும் 19ஆம் தேதி (நாளை) தொடங்கி ஜூன் 1ஆம் தேதி வரை 7 கட்டங்களாக நடைபெறுகிறது. முதல்கட்டமாக தமிழகம், புதுச்சேரி, கேரளா உள்ளிட்ட 21 மாநிலங்களில் உள்ள 102 தொகுதிகளுக்கு நாளை வாக்குப்பதிவு நடைபெறுகிறது.

இந்நிலையில் தேர்தலில் போட்டியிடும் பா.ஜ.க. வேட்பாளர்களுக்கு பிரதமர் மோடி கடிதம் எழுதியுள்ளார். அந்த வகையில் தமிழக பாஜக தலைவரும், கோவை பா.ஜ.க. வேட்பாளர் அண்ணாமலைக்கு பிரதமர் மோடி எழுதியுள்ள கடிதத்தில் கூறியிருப்பதாவது;-

"ராம நவமியை முன்னிட்டு எனது சக காரியகர்த்தா அண்ணாமலைக்கு கடிதம் எழுதுகிறேன். நீங்கள் நலமாக இருக்கிறீர்கள் என்று நம்புகிறேன். மதிப்புமிக்க வேலையை விட்டுவிட்டு நேரடியாக மக்களுக்கு சேவை செய்ய வந்துள்ள உங்கள் முடிவை வாழ்த்துகிறேன்.

தமிழகம் முழுவதும் பாஜகவின் அடிமட்ட இருப்பை வலுப்படுத்துவதிலும், சட்ட அமலாக்கம், நிர்வாகம் மற்றும் இளைஞர்களுக்கு அதிகாரமளித்தல் உள்ளிட்ட முக்கியப் பிரச்சினைகளை முன்னிறுத்துவதில் நீங்கள் உண்மையிலேயே முக்கியப் பங்காற்றியுள்ளீர்கள்.

உங்களின் உறுதியான தலைமையால் கோவைக்கு பெரும் பலன் கிடைக்கும். மக்களின் ஆசீர்வாதத்துடன் நீங்கள் நாடாளுமன்றத்திற்கு வருவீர்கள் என்று நான் நம்புகிறேன். உங்களைப் போன்ற குழு உறுப்பினர்கள் எனக்கு பெரும் சொத்து. ஒரே அணியாக தொகுதி மக்களின் நலனுக்காகவும், நாட்டின் நலனுக்காகவும் பாடுபடுவோம்.

இது சாதாரண தேர்தல் அல்ல என்பதை இக்கடிதத்தின் மூலம் உங்கள் தொகுதி மக்களுக்கு தெரிவித்துக் கொள்கிறேன். இந்தியா முழுவதும் உள்ள குடும்பங்கள், குறிப்பாக மூத்த குடிமக்கள், காங்கிரஸ் ஆட்சியில் தாங்கள் பட்ட கஷ்டங்களை நினைவில் கொள்வார்கள். கடந்த 10 ஆண்டுகளில் சமூகத்தின் ஒவ்வொரு பிரிவினரின் வாழ்க்கைத் தரமும் மேம்பட்டுள்ளது. பல பிரச்சினைகள் தீர்க்கப்பட்டுள்ளன.

செய்ய வேண்டியது அதிகம். அனைவருக்கும் சிறந்த வாழ்க்கையை உறுதி செய்யும் பணியில் இந்தத் தேர்தல் முக்கியமானதாக இருக்கும். நமது நிகழ்காலத்தை ஒளிமயமான எதிர்காலத்துடன் இணைக்க இந்தத் தேர்தல் ஒரு வாய்ப்பு.

இப்போது சூரியன் மிகவும் சூடாக இருப்பதை நான் அறிவேன். எவ்வாறாயினும், இந்த தேர்தல் நமது நாட்டின் எதிர்காலத்திற்கு மிகவும் முக்கியமானது. எனவே, மக்கள் காலையிலேயே வாக்களிக்குமாறு கேட்டுக் கொள்ளப்படுகிறார்கள்.

எனது முழு நேரத்தையும் நாட்டு மக்களின் நலனுக்காகவே செலவிடுகிறேன். தேர்தலில் வெற்றி பெற எனது மனமார்ந்த வாழ்த்துகளை தெரிவித்துக்கொள்கிறேன்” என்றார்.

இவ்வாறு பிரதமர் மோடி தனது கடிதத்தில் கூறியுள்ளார்.