மனநலம் பாதிக்கப்பட்ட பெண்ணை பாலியல் பலாத்காரம் செய்த இருவர் கைது!

சில மனிதர்கள் தங்கள் மிருகத்தனமான ஆசைகளை பூர்த்தி செய்துகொள்ள எவ்வளவு கீழ்த்தரமான செயல்களையும் செய்ய தயாராக இருக்கிறார்கள். சில சம்பவங்களைப் பற்றி நாம் கேள்விப்படும்போது, இப்படிப்பட்ட உலகில் நாம் வாழ்கிறோமா என வெட்கப்படும் நிலைக்கு ஆளாகிறோம்.

 திருச்சி ஜிஹெச் அருகே சாலை பிளாட்ஃபாரத்தில் தங்கியிருந்த மனநலம் பாதிக்கப்பட்ட ஒரு இளம் பெண் பாலியல் பலாத்காரம் செய்யப்பட்ட வழக்கில் செவ்வாய்க்கிழமை இரண்டு பேரை போலீசார் கைது செய்தனர்.

இந்த சம்பவம் செப்டம்பர் 17 அன்று நடந்ததாகக் கூறப்படுகிறது. அப்போது அந்த பெண் பிளாட்ஃபாரத்தில் தூங்கிக்கொண்டிருந்தார். இரவு 11.30 மணியளவில் இரண்டு பேர் பைக்கில் வந்து தாங்கள் காவல் துறையை சேர்ந்தவர்கள் என தங்களை அறிமுகப்படுத்திக் கொண்டனர்.

விசாரணையின் பேரில் அப்பெண்ணை அவர்கள் ஒதுக்குப்புறமான இடத்திற்கு அழைத்துச் சென்றனர். அங்கு தங்கள் நண்பர்களுடன் சேர்ந்து அவர்கள் அப்பெண்ணை பாலியல் பலாத்காரம் செய்ததாகக் கூறப்படுகிறது. காயமடைந்த பெண்ணை மறுநாள் அதிகாலையில் அவர்கள், அதே பிளாட்ஃபாரத்தில் இறக்கிவிட்டு தப்பிச் சென்றதாக நம்பப்படுகிறது.

கார்த்திக் என்ற ஒரு மெஸ் உரிமையாளர், இரத்தப்போக்குடன் வலியால் துடித்த பெண்ணைக் கண்டறிந்து, 100 ஹெல்ப்லைனை தொடர்பு கொள்ள முயன்றார். ஆனால் அவருக்கு தொடர்பு கிடைக்கவில்லை. பின்னர் அவர் வக்கீல்கள் மற்றும் சமூக ஆர்வலர்களான ஜெயந்தி ராணி மற்றும் சித்ரா ஆகியோரை தொடர்பு கொண்டார். அவர்கள் சம்பவ இடத்திற்கு விரைந்து சென்று அந்த பெண்ணை மீட்டனர். ஆர்வலர்கள் போலீசாருக்கு (Police) தகவல் அளித்து புகார் பதிவு செய்தனர்.

அதன் அடிப்படையில் வோரையூர் போலீஸ் இன்ஸ்பெக்டர் விஜயகுமார் மற்றும் அவரது குழுவினர், அனைத்து மகளிர் போலீஸ் இன்ஸ்பெக்டர் ஆனந்த வேதவள்ளி ஆகியோர் சம்பவ இடத்திற்கு விரைந்து சென்று, அப்பெண்ணை எம்.ஜி.எம் மருத்துவமனையில் சேர்த்தனர். அங்கு அவர் சிகிச்சை பெற்று வருகிறார்.

இதற்கிடையில், பாதிக்கப்பட்டவரின் அறிக்கையின் அடிப்படையில், வழக்கறிஞர் ஜெயந்தி ரானி முதலமைச்சர், மாவட்ட ஆட்சியர் மற்றும் நகர காவல் ஆணையருக்கு புகார் அனுப்பினார்.

"அவர் மிகுந்த அதிர்ச்சியில் இருந்தார், ஆனால் அவருக்கு தகாத ஏதோ நடந்தது என்பதை அவரால் நினைவுபடுத்திக்கொள்ள முடிந்தது. இந்த சம்பவம் குறித்து நாங்கள் விரிவாக விசாரித்தபோது, ​​அந்த சம்பவத்தைப் பற்றி அவர் எங்களிடம் கூறினார். விரைவில் குற்றவாளிகளை அடையாளம் கண்டு உடனடியாக கைது செய்ய வேண்டும் என்று வலியுறுத்தி புகார் அளித்தோம்” என்று ஜெயந்தி ரானி கூறினார்.

செவ்வாய்க்கிழமை, உதவி ஆணையர் (ஸ்ரீரங்கம்) சுந்தரமூர்த்தி மற்றும் அவரது குழுவினர், முஸ்தபா மற்றும் சிவா என அடையாளம் காணப்பட்ட இருவரை கைது செய்து IPC 376 D (கூட்டு கற்பழிப்பு) உள்ளிட்ட பல்வேறு பிரிவுகளின் கீழ் வழக்கு பதிவு செய்துள்ளது. மற்ற இரண்டு குற்றவளிகள் தேடப்பட்டு வருகின்றனர்.